Fundu reikning Magnúsar í Danmörku sem enginn vissi um

Þrotabú United Silicon höfðaði fyrr í mánuðinum annað skaðabótamál á hendur Magnúsi Ólafi Garðssyni, stofnanda og fyrrverandi forstjóra United Silicon, fyrir fjársvik. Þrotabúið gerir kröfu í 570 þúsund evrur, jafnvirði 71 milljónar króna, sem talið er að Magnús hafi látið leggja inn á bankareikning í Danmörku. RÚV greinir frá.

United Silicon stefndi Magnúsi í upphafi árs fyrir útgáfu tilhæfulausra og falsaðra reikningu. Í stefnunni var farið fram á staðfestingu á kyrrsetningu sýslumannsins á höfuðborgarsvæðinu á fasteignum Magnúsar í Kópavogi og í Danmörku, ásamt tveimur bifreiðum Magnúsar, Teslu og Mercedes Benz, sem og eignarhlutum hans í tveimur félögum, Brimstone ehf. og Tomahawk Development á Íslandi hf.

Þá fór United Silicon frma á að hann yrði dæmdur til að greiða félaginu jafnvirði rúmlega 520 milljónir króna í bætur vegna málsins. Er hann sakaður um að hafa dregið sér um hálfan milljarð með fölsuðum reikningum gefnum út á búnaðarframleiðandann Tenova Pyromet á Ítalíu.

112 milljónir króna frá Hollandi

Nýja stefna þrotabúsins á rætur að rekja til rannsóknarvinnu endurskoðendafyrirtækisins KMPG fyrir þrotabúið. KPMG fann bankareikning sem Magnús er talinn hafa látið leggja hluta peninganna inn á. Síðan hafi hann tekið peningana út og notað sjálfur.

Þá er þrotabúið einnig að reyna að innheimta tryggingabætur frá Hollandi vegna tjóns í kísilverinu í Keflavík sökum gallaðs búnaðar. Tryggingafélagið samþykkti bæturnar. Tryggingatakinn var hins vegar ekki United Silicon á Íslandi heldur United Silicon Holdings í Hollandi hvers forsvarsmaður er Magnús.

Neitar tryggingafyrirtækið að greiða bæturnar nema með samþykki Magnúsar. Af þeim sökum hefur þrotabúið stefnt Magnúsi fyrir dóm í Hollandi og krefjast þess að hann samþykki að bæturnar verði greiddar til þrotabúsins. Við því hafi orðið á dögunum þegar þrotabúið fékk 112 milljónir króna inn á reikning sinn segir í frétt RÚV.

Arion banki forgangskröfuhafi

Geir Gestsson, skiptastjóri þrotabús United Silicon, segir í samtali við Vísi að mögulegt sé að frekari mál verði höfðuð á vegum þrotabúsins. Frestur til að lýsa kröfum í búið rann út í 30. mars 2018 en alls námu kröfurnar um 23,5 milljörðum króna. Arion banki er forgangskröfuhafi en 9 milljarðar króna af 9,5 milljarða kröfu bankans í búið voru samþykkt sem forgangskrafa.

Íslenskir aðalverktakar og Tenova South Africa voru ósammála niðurstöðu skiptastjórans og hafa höfðað mál í héraði til að fá niðurstöðu í málinu. Málið er komið á dagskrá Héraðsdóms Reykjaness 12. september.