Hlutur ferðaþjónustu í landsframleiðslu jókst milli ára

Bráðabirgðaniðurstöður ferðaþjónustureikninga gefa til kynna að hlutur ferðaþjónustu í landsframleiðslu hafi numið 8,6% árið 2017. Þetta er aukning frá fyrri árum en til samanburðar nam hlutur ferðaþjónustu í landsframleiðslu 8,1% árið 2016 og 6,2% árið 2015. Þetta kemur fram á vef Hagstofu Íslands.

Þessi aukning í hlutdeild af landsframleiðslu var nokkuð minni árið 2017 en árin 2015 og 2016 en sambærileg því sem hún var á árunum 2012 til 2014. Ferðaþjónustureikningar eru hliðarreikningar þjóðhagsreikninga og er þeim ætlað að leggja mat á hlut ferðaþjónustunnar í hagkerfinu og þroun hennar sem atvinnugrein.

Komur erlendra ferðamanna hingað til lands voru alls 2.690.465 árið 2017 sem er 25,4% aukning frá fyrra ári. Flestir ferðamenn sem koma til landsins eru gistifarþegar sem koma með millilandaflugi. Gistifarþegum fjölgaði um 24,1% sem er mun meiri aukning en í fjölda gistinátta en þeim fjölgaði um 7,3%.

Útgjöld erlendra ferðamanna meiri

Heildarútgjöld erlendra ferðamanna námu 376,6 milljörðum króna árið 2017 en þau námu 346 milljörðum króna árið 2016. Tæpur fjórðungur útgjaldanna kom til vegna kaupa á gistiþjónustu eða 85,6 milljarðar króna. Eins greiddu erlendir ferðamenn 71,4 milljarða til ferðaskipuleggjenda og ferðaskrifstofa og 65 milljarða til innlendra flugfélaga bæði vegna fargjalda hingað til lands og innanlands.