Skallagrímur fær Kana beint úr háskólaævintýri

Framherjinn Aundre Jackson hefur samið við nýliða Skallagríms og mun leika með liðinu í Dominos deild karla á komandi leiktíð.

Í tilkynningu sem körfuknattleiksdeild Skallagríms sendir frá sér segir að Aundre sé 196 sentimetrar á hæð og 110 kíló að þyngd. Hann er að koma beint úr háskólaboltanum vestanhafs.

Þar lék hann með Loyola háskólanum í Chicago og var hluti af liði sem komst óvænt í undanúrslit NCAA deildarinnar. Aundre skilaði 11 stigum að meðaltali í leik auk þess að taka 3,2 fráköst að meðaltali og var að spila um 19 mínútur í leik.