Ballið búið á Borðinu

Aðstandendur veitingastaðarins Borðsins, sem stendur við Ægissíðu í Vesturbæ Reykjavíkur, hafa ákveðið að loka staðnum. Þetta kemur fram í stöðuuppfærslu á Facebooksíðu staðarins.

Helsta ástæðan fyrir því að staðurinn lokar er ákvörðun Reykjavíkurborgar um að synja þeim um sölu á léttvíni og bjór. Eigendur Borðsins, þau Friðrik Ársælsson, Rakel Eva Sævarsdóttir, Martina Vigdís Nardini og Jón Helgi Sen Erlendsson, hafa um langt skeið barist fyrir því að fá vínveitingaleyfi.

Greint var frá því í fyrra að klaufaskapur af hálfu borgarinnar hafi leitt til þess að í fyrstu var tekið með jákvæðum hætti í umsókn eigenda Borðsins um vínveitingaleyfi en úrskurðarnefnd umhverfis- og auðlindamála synjaði þó beiðninni á þeim forsendum að Ægissíða er ekki aðalgata í gildandi aðalskipulagi.

Lög kveða á um að til að njóta vínveitingaleyfis þurfi rekstur að vera í húsnæði við aðalgötu eða innan skilgreinds nærþjónustukjarna. Það var síðan í byrjun apríl, síðastliðinn, sem vínveitingaleyfið fékkst en, að því er séð verður, allt of seint.

„Eftir á að hyggja má segja að staðurinn hafi lifað óvenju lengi án vínveitingaleyfis, en það er að sjálfsögðu hlýjum móttökum íbúa hverfisins og þeim mikla meðbyr sem við höfum alltaf fengið frá viðskiptavinum okkar að þakka.“

Þá segir ennfremur: „Það segir sig hins vegar sjálft að á veitingastöðum þar sem boðið er upp á vandaðan mat, sem eldaður er af reynslumiklum matreiðslumönnum, góða þjónustu og notalegt andrúmsloft, gera viðskiptavinir jafnframt kröfu um að boðið sé upp á vín, bjór og jafnvel kokteila með.“

Það hafi tekið sinn toll af eigendum staðarins að hafa ekki vínveitingaleyfi í tvö ár.

„Allir þeir sem til þekkja vita að rekstur slíkra veitingastaða án veitinga og tilheyrandi lengri opnunartíma gengur einfaldlega ekki upp til lengri tíma. Þegar vínveitingaleyfið kom í hús eftir tveggja ára baráttu og bið, vorum við sem að staðnum stöndum einfaldlega búin að missa dampinn og að einhverju leyti trúna á konseptinu og töldum fyrir bestu að leyfa nýjum aðila að byrja upp á nýtt. “