Brann enn taplausir á toppnum í Noregi

Lillestrøm og Brann gerðu 1-1 jafntefli þegar liðin mættust í lokaleik 11. umferðar norsku úrvalsdeildarinnar í knattspyrnu í kvöld.

Lillestrøm komst yfir á 35. mínútu með marki frá Nígeríumanninum Ifeanyi Matthew og var staðan í hálfleik 1-0 fyrir heimaliðinu.

Það var síðan ekki fyrr en á 83. mínútu sem Brann jafnaði leikinn með marki frá Ludcinio Marengo. Fleiri urðu mörkin ekki og lokatölur því 1-1.

Brann situr á toppi deildarinnar með 27 stig en liðið hefur ekki tapað leik á árinu. Meistararnir í Rosenborg sitja í 2. sætinu með 24 stig.

Lillestrøm eru aftur á móti að berjast í neðri hluta deildarinnar og er liðið í 11. sæti með 11 stig eftir 11 leiki.