Tökulið Sextíu mínútna á lúxushóteli í Keflavík

Anderson Cooper, fréttamaður hins virta fréttaskýringarþáttar Sextíu mínútna, gisti og tók viðtal á fyrsta fimm stjörnu hóteli landsins, Diamond Suites. Þar verður Cooper ásamt tökuliði frá fréttastöðinni CBS fram á kvöld. Þetta kom fyrst fram hjá Víkurfréttum.

„Þeir leituðust við að fá fallegt umhverfi og vildu vera hjá okkur til að koma þessu frá sér,“ segir Steinþór Jónsson, hótelstjóri Diamond Suites sem tók vel á móti Cooper.

Cooper kom til landsins í gær og dvelur á lúxushótelinu Diamond Suites í Keflavík. Tilgangur Íslandsferðarinnar var að taka upp viðtal fyrir fréttaskýringarþáttinn Sextíu mínútur en Steinþór hótelstjóri sagðist ekki vita hvert umfjöllunarefni þáttarins sé og þá sagðist hann heldur ekki hafa þekkt viðmælandann.

Cooper tók viðtalið sitt í hádeginu í dag en að því loknu sagðist hann vera virkilega spenntur að fara út og taka myndir af íslenskri náttúru. „Honum fannst svæðið vera gott. Manni fannst nú vera kalt í morgun en eins og maður segir, þá eru útlendingar fljótir að sjá fegurðina hjá okkur,“ segir Steinþór.

En hvers konar maður er Anderson Cooper? Er hann harður í horn að taka?

„Hann er virkilega geðugur. Það var gaman að tala við hann. Hann fór að gantast með að við værum svolítið líkir. Hann lét taka mynd af okkur bæði með gleraugu og án til þess að sjá hversu líkir við værum. Hann hafði frumkvæði að þessu,“ segir Steinþór.

Steinþór segir að Cooper hafi sagt sér frá því hvernig starfinu í Sextíu mínútum sé háttað. Hann fljúgi um allan heim um helgar en síðan taki við úrvinnsla efnisins. „Það er engin pása hjá svona fólki, ekki frekar en hjá hótelstjóranum í Keflavík,“ segir Steinþór og skellir upp úr.

„Það er alveg ótrúlegt hvað það er vinsælt og gengur vel,“ segir Steinþór um reksturinn. „Við finnum aukningu í hvert skipti sem kemur ný þjónusta á Íslandi sem hentar svona ferðamönnum. Þannig að framtíðin er björt hjá okkur því það er margt í bígerð í þessum í geira og ég held það verði öllum til hagsbóta, bæði litlum sveitarfélögum eins og okkar og landinu til framtíðar.“