KSÍ bætir við í hóp bakhjarla

Knattspyrnusamband Íslands og Vodafone undirrituðu í dag samning þess efnis að Vodafone bætist í hóp styrktaraðila sambandsins, sem telur nú sex talsins.

Þetta var tilkynnt í dag og er samningurinn til næstu þriggja ára.

Fréttatilkynningu Vodafone á Íslandi má lesa hér fyrir neðan en tekið skal fram að Fjarskipti hf., móðurfélag Vodafone, er einnig eigandi Vísis, fréttastofu Stöðvar 2 og Stöð 2 Sport.

„Vodafone verður einn af bakhjörlum KSÍ

Vodafone á Íslandi (Fjarskipti hf.) skrifaði í dag undir samstarfssamning við Knattspyrnusamband Íslands (KSÍ) og er þar með orðinn einn af bakhjörlum sambandsins. KSÍ vinnur með sex innlendum bakhjörlum með það að markmiði að auka áhuga á knattspyrnu og efla grasrótarstarf um land allt. Samningurinn nær til landsliða karla og kvenna innan KSÍ.

Samstarfssamningur Vodafone og KSÍ gildir í tæp þrjú ár en Vodafone annast meðal annars fjarskiptaþjónustu KSÍ og veitir sambandinu tæknilega aðstoð. Þetta á meðal annars við á ferðum landsliðsins erlendis þar sem Vodafone á Íslandi byggir þjónustu og vöruúrval í nánu samstarfi við Vodafone Group, eitt stærsta og öflugasta fjarskiptafélag í heimi. Stöð 2 Sport, sem er einn miðla Fjarskipta, á fyrir í víðtæku samstarfi við KSÍ um beinar útsendingar frá leikjum og umfjöllun um Pepsi-deild kvenna og karla auk þess að hafa tryggt sér sýningarrétt á Þjóðardeild karla árið 2019 og Evrópukeppni karla árið 2020.

„Vodafone er stolt af því að vera bakhjarl öflugs starfs KSÍ hvort sem kemur að grasrótarstarfi sem og öflugum landsliðum karla og kvenna. Nýjar höfuðstöðvar okkar eru með gott útsýni yfir Laugardalsvöllinn og við finnum greinilega fyrir miklum áhuga sem velgengni landsliða okkar hefur kveikt bæði meðal viðskiptavina og erlendra samstarfsaðila. Miðlar okkar hafa mikla aðkomu að íþróttum og tengdri framleiðslu þar sem Stöð 2 Sport hefur tryggt sér sýningarrétt á Þjóðardeild UEFA, þar sem karlalandsliðið okkar tekur þátt árið 2019, og Evrópukeppni karla árið 2020. Næsta stóra verkefni fyrir íslenskt landslið er heimsmeistarakeppnin í ár þar sem við munum styðja við þétt bakið á KSÍ og fylgjast spennt og stolt með eins og þjóðin öll“, segir Stefán Sigurðsson forstjóri Vodafone (Fjarskipta hf.).“