Fimm fluttir á sjúkrahús eftir árekstur á einbreiðri brú yfir Stóru-laxá í Hrunamannahrepp

Skeiða- og Hrunamannavegur er nú lokaður í nágrenni Stóru-Laxár vegna umferðaróhapps. Árekstur tveggja bíla varð á brúnni yfir Stóru-laxá í Hrunamannahrepp um klukkan tíu í morgun.

Áreksturinn atvikaðist þannig að vöruflutningabifreið var ekið yfir brúna sem er einbreið, þegar að fólksbifreið var ekið inn á brúna úr gagnstæðri átt með þeim afleiðingum að fólksbifreiðin lenti framan á vöruflutningabifreiðinni.

Bílstjórinn var einn í flutningabílnum en fimm einstaklingar voru í fólksbílnum. Mikill viðbúnaður var hjá viðbragðsaðilum vegna slyssins en sex manns voru í bifreiðunum. Tækjabíll frá Brunavörnum Árnessýslu á Flúðum var sendur á vettvang, lögregla, sjúkraflutningar Heilbrigðisstofnunar Suðurlands auk vettvangshjálparteymis frá Flúðum fóru á vettvang.

Þeir sem voru í fólksbifreiðinni voru fluttir á Heilbrigðisstofnun Suðurlands á Selfossi til nánari skoðunar og aðhlynningar.

Pétur Pétursson, slökkviliðsstjóri hjá Brunavörnum Árnessýslu, segir í samtali við Vísi að svo virðist sem að ekki hafi orðið alvarleg slys á fólki við áreksturinn. Hann segir að ekki hafi þurft að nota klippur við að ná fólkinu út úr fólksbílnum, en þau eru ferðamenn hér á landi.

Vegurinn er ennþá lokaður og verður um hríð meðan að unnið er að því að ná bílunum af veginum.

Fréttin hefur verið uppfærð.