Einmana jólatré í sandi gekk í endurnýjun lífdaga

Einmana jólatré á söndunum við Þorlákshöfn hefur öðlast nýtt líf eftir að hjón á staðnum tóku sig til og fóru að skreyta jólatréð með jólaseríum. Tréð fær mikla athygli vegfarenda á leið í og úr Þorlákshöfn.

Hjónin Gísli Eiríksson og Þórunn Jónsdóttir sem búa í Þorlákshöfn hafa vitað lengi af trénu á sandinum nokkrum kílómetrum áður en komið er til Þorlákshafnar.

Þeim fannst tréð alltaf einmana, enda eina grenitréð á stóru svæði, eitt og yfirgefið. Þau ákváðu að taka tréð í fóstur um jólin og skreyta það vegfarendum og íbúum Þorlákshafnar til mikillar ánægju.

„Þetta átti nú bara að vera svona létt grín í upphafi,“ segir Þórunn. 

„Mér sýnist að öllu að þessu hafi annaðhvort verið hent hingað eftir jól eða fokið af bíl,“ segir Gísli. 1400 perur eru á trénu glæsilega.

Rætt var við Þórunni og Gísla í kvöldfréttum Stöðvar 2 í kvöld. Sjá að neðan.