Everton fær ekki heldur Rangnick

Everton er enn í stjóraleit og var Þjóðverjinn Ralf Rangnick nú síðast orðaður við félagið. En svo virðist sem að hann sé ekki á leið frá RB Leipzig.

Þýska félagið brást við fréttum um áhuga Everton á Rangnick með því að segja frá því að viðræður um nýjan samning við hann séu langt komnar.

„Við reiknum með því að framlengja samningn hans fyrr en áætlað var í þessari viku,“ sagði Oliver Mintzlaff, framkvæmdastjóri þýska liðsins, í samtali við Bild.

„Ralf Rangnick er vélin sem keyrir þetta félag áfram og nauðsynlegur þáttur af framtíðaráætlunum þess,“ sagði Mintzslaff enn frekar.

David Unsworth hefur sinnt starfi stjóra Everton síðan að Ronald Koeman var rekinn fyrir mánuði síðan. Forráðamenn Everton reyndu að fá Marco Silva frá Watford en því var hafnað.

Unsworth hefur ekki áhyggjur af stöðu mála og einbeitir sér að sínu starfi.

„Allt sem ég geri frá því að ég vakna á morgnana þar til að ég fer að sofa á kvöldin snýst um Everton,“ sagði hann.

RB Leipzig náði frábærum árangri á síðustu leiktíð í Þýskalandi og hafnaði í öðru sæti. Liðið er nú í þriðja sæti, sex stigum á eftir toppliði Bayern. Þá á Leipzig enn möguleika á að komast í 16-liða úrslit Meistaradeildarinnar.

Everton mætir Atalanta í Evrópudeild UEFA í kvöld en enska liðið er þegar úr leik í keppninni. Leikurinn hefst klukkan 20.00 og er í beinni útsendingu á Stöð 2 Sport.