Dæmdur fyrir að mynda í laumi í kvennaklefa Crossfit Reykjavík

Héraðsdómur Reykjavíkur hefur dæmt karlmann til þrjátíu daga skilorðsbundinnar fangelsisvistar fyrir að taka myndband af konu í kvennaklefa á meðan hún var nakin í sturtu og fyrir tilraun til að gera hið sama þegar önnur kona fór í sturtu.

Atvikið átti sér í Crossfit Reykjavík í Skeifunni í apríl árið 2016.

Maðurinn var starfsmaður Crossfit Reykjavík þegar hann framdi brotin. Fyrir dómi játaði hann brot sín skýlaust og sagðist hafa viðurkennt þau strax fyrir konunum og öllum hlutaðeigandi og beðist afsökunar.

Hrönn Svansdóttir, framkvæmdastjóri Crossfit Reykjavík, sagði í samtali við Vísi þegar málið kom upp í apríl í fyrra, að stöðin líti málið alvarlegum augum og brugðist hefði verið við því. Viðkomandi var látinn hætta og eftirlitsmyndavélum komið upp í stöðinni.

Maðurinn sagðist hafa leitað sér faglegrar aðstoðar hjá geðlækni og fylgi því eftir enn í dag. Þá gerði hann grein fyrir sínum persónulegu högum en honum var sagt upp störfum hjá Crossfit Reykjavík í kjölfar þess að hann greindi vinnuveitanda sínum frá þessu máli.

Geðlæknir sagði manninn hafa sýnt iðrun

Haft var eftir geðlækni mannsins í þessu máli að maðurinn hefði sýnt iðrun, tekið miklum framförum og sýnt vilja til að ná tökum á lífi sínu. Sagði geðlæknirinn að um batahorfur þeirrar fíknar sem maðurinn glími við gildi sömu lögmál og um aðrar fíknir, engin leið sé að segja til um varanlegan árangur meðferðar en stundi hann meðferðina og fari eftir öllum ráðleggingum, séu batahorfur góðar.  

Konurnar fóru fram á milljón krónur hvor í bætur frá manninum. Maðurinn gekkst við bótakröfu konunnar sem hann tók upp á myndband, en krafðist sýknu af bótakröfu konunnar sem hann reyndi að taka upp á myndband á þeirri forsendu að ekki hafi verið um fullframið brot að ræða.

Í ákæru kom fram að maðurinn hefði farið inn í kvennaklefa í þeim tilgangi að ná myndbandi á snjallsíma sinn af konunni án hennar vitneskju á meðan hún var nakin í sturtu, en hætt við þar sem konan var á leið úr klefanum. Þegar hann mætti konunni var hann með kveikt á myndavél símans.

Óvissa um dreifingu á myndefninu

Dómurinn taldi manninn bótaskyldan gagnvart konunni og var litið til þess að konan gat ekki vitað hvort manninum hafði tekist að taka af henni myndir og var í óvissu með það.

Dómurinn dæmdi konunni sem var tekin upp á myndband 250 þúsund krónur í bætur. Átti hún rétt á bótum að mati dómsins vegna óvissu um dreifingu á myndefninu. Dómurinn tók þó fram að ekki hafi fundist saknæmt efni við rannsókn á síma og tölvu mannsins. Brotið hafði þó mikil áhrif á konuna og þótti dómnum fékk því dæmdar fyrrnefndar bætur upp á 250 þúsund krónur.

Konan sem maðurinn reyndi að taka upp á myndband fékk 150 þúsund krónur í bætur frá manninum samkvæmt dómnum. Féllst dómurinn á að skaði konunnar hafi verið minni en þegar brotið var fullframið.

Maðurinn var dæmdur til þrjátíu daga fangelsisvistar en fresta skal fullnustu dómsins haldi hann skilorði í tvö ár. Er það jafnframt bundið því skilyrði að hann sæki stuðningsviðtöl hjá geðlækni eins og ástæða þykir og ekki sjaldnar en þrisvar ár ári.