Sjáðu fullkomnu þrennuna hjá Alfreð | Myndband

Alfreð Finnbogason skoraði öll þrjú mörk Augsburg í 3-0 sigri á Köln á heimavelli í þýsku deildinni í dag en þetta er annar leikurinn í röð sem Alfreð skorar í.

Kom hann Augsburg yfir með skalla af stuttu færi áður en hann bætti við öðru marki af vítapunktinum með sínum sterkari fæti, hægri fætinum.

Hann var svo mættur til að afgreiða boltann í autt netið með vinstri fæti í uppbótartíma eftir skyndisókn Augsburg og fullkomna með því hina svokölluðu fullkomnu þrennu, eitt með vinstri, eitt með hægri og eitt með skalla.

Myndband af þessu má sjá í spilaranum hér fyrir ofan.