Það er mikill áhugi á Birni Bergmanni Sigurðarsyni sem hefur slegið í gegn í norsku úrvalsdeildinni í sumar. Vísir greindi frá því að rússneska félagið Rostov hefði áhuga á kappanum og vildi kaupa hann.
Hingað til hefur Molde hafnað tilboðum annarra liða í Björn Bergmann en Rostov lagði fram nýtt tilboð í gær, samkvæmt fréttavef VG í Noregi. Talið er að tilboðið sé meira en tíu milljónir norskra króna, jafnvirði 136 milljóna íslenskra króna.
Sjá einnig: Rostov vill kaupa Björn Bergmann
Í fyrirsögn VG segir að það sé komið upp tilboðsstríð í Björn Bergmann en Magnús Agnar Magnússon, umboðsmaður hans, staðfestir að það sé áhugi á kappanum.
Björn Bergmann er næstmarkahæsti leikmaður norsku deildarinnar og næsthæstur í einkunnagjöf VG. Molde er enn í baráttu um efstu sætin í Noregi og komið í 8-liða úrslit bikarsins þar í landi.
Rostov er einnig félag Sverris Inga Ingasonar sem hélt til Rússlands í sumar. Magnús Agnar er einnig umboðsmaður hans.
