Fótboltalandsliðið líka komið til Helsinki

Strákarnir í íslenska fótboltalandsliðinu eru komnir til Finnlands þar sem þeir munu undirbúa sig undir leikina mikilvægu gegn Finnlandi og Úkraínu í undankeppni HM 2018.

Íslenska liðið dvelur í Helsinki fram á fimmtudag þegar það heldur til Tampere þar sem leikurinn gegn Finnum fer fram á laugardaginn.

Karlalandsliðið í körfubolta kom einnig til Helsinki í morgun þar sem það keppir á EM.

Áður en strákarnir í fótboltalandsliðinu fara til Tampere munu þeir mæta til að styðja við bakið á körfuboltaliðinu sem mætir Grikkjum á fimmtudaginn.

Fyrsta æfing íslenska liðsins var í dag. Í framhaldi af æfingunni fengu íslensku leikmennirnir ítarlegar upplýsingar um finnska liðið frá Arnari Bill Gunnarssyni sem hefur séð um kortleggja það undanfarna mánuði.

Ísland er í 2. sæti I-riðils með 13 stig, jafn mörg og topplið Króatíu en lakari markatölu.

Riðlakeppninni lýkur í byrjun október. Ísland mætir þá Tyrklandi í Eskisehir föstudaginn 6. október og tekur svo á móti Kósovó á Laugardalsvellinum mánudaginn 9. október.

Sigurvegarar riðlanna níu komast beint á HM en þau átta lið sem eru með bestan árangur í 2. sæti riðlanna fara í umspil um fjögur laus sæti á HM.