Óalgengt að þolendur kynferðislegrar áreitni á vinnustað leiti aðstoðar

Óalgengt er að þolendur kynbundinnar og kynferðislegrar áreitni og ofbeldis á vinnustað leiti sér aðstoðar. Auka þarf umræðu um áreitni í samfélaginu að mati BSRB en nýlega tóku gildi nýjar reglur sem ganga lengra í að verja starfsmenn gegn áreiti en áður.

Í fréttabréfi BSRB, sem sent var út í dag, kemur fram að afleiðingar áreitni og ofbeldi af kynferðislegum toga á vinnustað geti verið margs konar. Þá er óalgengt að þolendur áreitninnar leiti sér aðstoðar.

„Afleiðingar af áreitni og ofbeldi af þessu tagi geta verið ýmiskonar, bæði fyrir einstaklingana sem verða fyrir því, fyrir vinnustaðina og samfélagið í heild. Áhrif á einstaklingana geta til dæmis komið fram í verri heilsu, streitu, þunglyndi, niðurlægingu og pirringi. Þá getur áreitni og ofbeldi haft í för með sér tekjutap fyrir þá sem fyrir því verða.“

Þá leggja samtökin áherslu á að gagnkvæm virðing á vinnustað sé sjálfsagður réttur alls launafólks og að starfsmenn eigi að njóta skilyrðislausrar verndar fyrir kynbundinni kynferðislegri áreitni og ofbeldi á vinnustöðum.

„Nýlega tóku gildi nýjar reglur sem ganga lengra í að verja starfsmenn en áður. Þannig er það til að mynda skylda vinnuveitenda að vernda starfsmenn sína fyrir áreiti af hendi þriðja aðila, til dæmis viðskiptavina. Þá verða vinnuveitendur að bregðast við til að tryggja góða líðan starfsmanna þegar kvartað er yfir áreiti, hvort sem niðurstaða athugunar leiðir í ljós að um áreiti hafi verið að um áreiti hafi verið að ræða eða ekki,“ segir í fréttabréfinu.

Þá er bent á bækling BSRB, ASÍ, BHM, KÍ, Jafnréttisráðs og Jafnréttisstofu þar sem farið er yfir ýmis atriði tengd kynbundinni og kynferðislegra áreitni og ofbeldi á vinnustöðum.