RB Leipzig setur 70 milljóna punda verðmiða á Keïta

RB Leipzig, silfurlið þýsku úrvalsdeildarinnar á síðasta tímabili, hefur sett 70 milljóna punda verðmiða á gíneska miðjumanninn Naby Keïta. The Guardian greinir frá.

Liverpool hefur mikinn áhuga á Keïta sem sló í gegn í þýsku úrvalsdeildinni í vetur. Gíneinn skoraði átta mörk og gaf sjö stoðsendingar í 31 deildarleik á síðasta tímabili.

Keïta hefur neitað að gera nýjan samning við RB Leipzig en hann á þrjú ár eftir af núgildandi samningi sínum við félagið.

Samkvæmt frétt The Guardian er Liverpool að íhuga 50 milljóna punda tilboð í Keïta. Óvíst er hvort félagið er tilbúið að bjóða meira í miðjumanninn öfluga.

Keïta, sem er 22 ára, kom til RB Leipzig frá systurfélaginu Red Bull Salzburg síðasta sumar. Þýska félagið borgaði 10 milljónir punda fyrir hann.