Krúttlegar Costco-pöddur hjartanlega velkomnar

Óhætt er að segja að Íslendingar hafi tekið Costoco opnum örmum, svo mjög að jafnvel pöddur sem hafa gerst laumufarþegar með grænmetinu sem flutt er til landsins í gámavís á vegum Costco, þykja aufúsugestir.

Ýmis dæmi eru um ofsafengin viðbrögð neytenda í gegnum tíðina við því ef pöddur leynast í matvælum.

Þessi frásögn er á við handrit að hryllingsmynd - paddan í bjórglasinu. Sem dæmi.

En, þetta á ekki við um Costco. Þetta sýnir sig á Facebookhópnum „Keypt í Costco Ísl.- Myndir og verð.“ – sem á skömmum tíma hefur orðið einn stærsti Facebookhópur á Íslandi. Stjórnandi hópsins, Sólveig Bergland Fjólmundsdóttir, er reyndar afar virk í að eyða út öllum innleggjum þar sem henni finnst orka tvímælis og eru hugsanlega neikvæð í garð fyrirtækisins. Svo mjög að mörgum þykir nóg um. Hún er þó ekki starfsmaður þess, eins og fram kom í viðtali við Sólveigu Bergland í gær.

Ekkert óeðlilegt við það þó pöddur laumi sér með

Og, þannig er með langan þráð sem hér er vitnað í og hafður til marks um ofurjákvæðni í garð Costco. Hann fauk í hreingerningu stjórnandans en Vísir tók afrit af þeim fróðlegu umræðum sem lýsa breyttum tímum. Þar sagði ein kona: „Þessi laumaði sér með okkur heim úr Costco,“ og lætur fylgja með broskall sem blikkar glettnislega til lesenda. Með fylgir mynd af maríubjöllu, en þær virðast vera nokkuð áfjáðar í að fljóta með gámum til Íslands.

Önnur kona bendir á að ekki sé langt síðan snákur hafi verið á hraðferð um Krónuna og sá hafi komið með grænmeti eða ávöxtum frá útlöndum. Og hún man eftir risakönguló sem faldi sig innan um banana í Bónus. „Ekkert óeðlilegt við að pöddur og dýr laumist með,“ segir hún jákvæð. Af er sem áður var.

Til marks um ferskleika

Fleiri segjast hafa fengið maríubjöllu í „kaupbæti“ og ein kona bendir á að þetta sýni ferskleika vörunnar. Og karlmaður nokkur slær á létta strengi og segir þá í Costco góða, gæludýr fylgi og það kallar hann góð kaup. Einn annar talar um að þetta sé prótein og gott djúpsteikt.

Viðbrögðin eru sem sagt afar jákvæð við þessum myndum af skordýrum sem fylgja grænmetinu og ávöxtunum í Costco. „Það er bara merki um að það sé ekki löðrandi í eitri og vibba,“ segir önnur kona og lætur broskall fylgja.