Svanhildi veitt verðlaun á Degi íslenskrar tónlistar

Dagskrárgerðarkonunni og söngkonunni Svanhildi Jakobsdóttur var veitt verðlaunin Lítill fugl á Degi íslenskrar tónlistar sem haldinn var hátíðlegur í dag.

Verðlaunin eru veitt einstaklingi sem skarað hefur fram úr í dagskrárgerð, umfjöllun og stuðningi við íslenska tónlist. 

Svanhildur Jakobsdóttir hóf störf hjá Ríkisútvarpinu árið 1987. Í rökstuðningi segir að hún hafi ætlað sér aðeins að starfa þar í eitt ár, en árin séu nú að verða þrjátíu.

„Svanhildur hefur verið frumkvöðull og stjórnandi fjölda tónlistar- og viðtalsþátta, má þar nefna þættina: Stefnumót, Villtir strengir og vangadans, Föstudagsflétta og Laugardagsflétta, og nú síðast Óskastundin sem útvarpað er á föstudagsmorgnum. Svanhildur hefur unnið ómetanlegt starf í kynningu og umfjöllun um íslenska tónlist.  Samhliða störfum sínum hjá Rúv hefur Svanhildur einnig átt glæstan feril sem söngkona með Sextett Ólafs Gauks,“ segir í tilkynningu.