Wilbek: Glaður að fara ekki á HM með Guðmundi

Ulrik Wilbek, fyrrum þjálfari danska handboltalandsliðsins, segir að hann hafi tekið rétta ákvörðun þegar hann hætti sem íþróttastjóri danska handknattleikssambandsins.

Wilbek sagði sem kunnugt er upp störfum hjá danska handknattleikssambandinu eftir mál sem kom upp á Ólympíuleikunum í Ríó. Wilbek reyndi þá að koma því í kring að Guðmundur Guðmundsson yrði rekinn sem þjálfari danska landsliðsins, jafnvel eftir að Danir unnu Ólympíugullið.

„Ég er viss um að ég tók rétta ákvörðun þegar ég hætti,“ sagði Wilbek í samtali við Politiken. Þar segir Wilbek að það hefði reynst honum nánast ómögulegt að fara á HM í Frakklandi á næsta ári með Guðmundi.

„Ef ég hefði haldið áfram í starfi og farið á HM þá hefði ekki verið þverfótað fyrir fréttum þar sem okkur Guðmundi er stillt upp sem óvinum,“ sagði Wilbek sem segir það alrangt að hann hafi viljað láta reka Guðmund. Málið sé á misskilningi byggt. Wilbek segist ennfremur ekki hafa talað við leikmenn danska landsliðsins eftir Ólympíuleikana.

Wilbek vildi lítið tjá sig um Nikolaj Jacobsen sem verður að öllum líkindum eftirmaður Guðmundar með danska landsliðið.

„Hann er flinkur þjálfari en meira vil ég ekki segja,“ sagði Wilbek sem hefur hellt sér út í pólitík og freistar þess nú að verða borgarstjóri í Viborg þar sem hann er í miklum metum.