Afmælissýning á Hótel Höfn

„Skemmtifélagið hafði samband við mig sem gamlan hljómsveitarstjóra og stakk upp á að Hljómsveit Hauks yrði með í 50 ára afmælissýningu Hótels Hafnar, hún var svo oft búin að spila þar fyrir dansi. Við vorum þakklát fyrir heiðurinn en niðurstaðan varð sú að ég kæmi einn fram fyrir hönd sveitarinnar,“ segir Haukur Þorvaldsson, netagerðar- og tónlistarmaður á Höfn. „Það er nú ekki mín sterkasta hlið að syngja en ég læt mig hafa það að taka tvö lög,“ bætir hann við glaðlega.



Sýningin sem frumsýnd er í kvöld nefnist Þannig týnist tíminn og er sú 15. sem Hornfirska skemmtifélagið setur upp á Hótel Höfn. Þar verða flutt vinsæl, íslensk lög frá árunum 1966 til 2016 í bland við gamanmál. Haukur segir um 20 manns koma að henni og að kynnar verði Erna Gísladóttir og Björn Sigfinnsson. 

„Í tilefni af 50 ára afmæli sínu býður hótelið gestum upp á fordrykk fyrir sýningar. Þá tekur við þriggja rétta kvöldverður, síðan sýningin sjálf og að henni lokinnileikur hljómsveitin KUSK fyrir dansi. Í tengslum við sýningar býður hótelið tveggja nátta gistingu með morgunmat á verði einnar," lýsir hann.

Haukur segir Hótel Höfn hafa haft mikið gildi fyrir staðinn og héraðið í heild. „Það var ótrúlegt afrek hjá þeim Árna Stefánssyni og Þórhalli Dan Kristjánssyni og þeirra konum, Svövu og Ólöfu Sverrisdætrum, að koma hótelinu upp á sínum tíma. Salurinn tók 120-30 í sæti og herbergin voru 20 í fyrstu en var fljótlega fjölgað um helming. Þetta var áður en vegurinn opnaðist sunnanlands og ekki margir á ferð yfir vetrartímann en þá fékk fiskvinnslufólk inni á hótelinu og salurinn var vinsæll fyrir fundi, árshátíðir og hvers kyns mannfagnaði.“  

Hafnarkirkja og Lionsklúbbur Hornafjarðar eru líka 50 ára á árinu, að sögn Hauks, svo 1966 var merkisár á Höfn.

 

Greinin birtist fyrst í Fréttablaðinu 15. október 2016.