Leikmenn Grindavíkur fá 300.000 króna bónus fyrir að komast upp um deild

Grindavík spilar í Pepsi-deild karla á nýjan leik næsta sumar en liðið hafnaði í öðru sæti Inkasso-deildarinnar í ár og snýr aftur í deild þeirra bestu eftir fjögurra ára fjarveru. Grindvíkingar féllu sumarið 2012 undir stjórn Guðjóns Þórðarsonar en liðið fékk aðeins tólf stig sem er þriðji versti árangur nokkurs liðs í sögu tólf liða deildar.

Suðurnesjamenn lentu í illvígum peningadeilum við Guðjón og voru neyddir af hæstarétti að greiða þjálfaranum laun sem hann taldi sig eiga rétt á. Eftir smá vandræði með peningamálin var stefnan tekin upp um deild í sumar.

„Það var ákveðið í október þegar við gengum frá ráðningu á Óla Stefáni [Flóventssyni] og Janko [Milan Stefáni Jankovic] að við ætluðum upp í Pepsi-deildina. Við vorum ekki eins vel stemmdir hin árin því við vorum í erfiðleikum með fjárhaginn en núna var ákveðið að fara í Pepsi-deildina,“ segir Jónas Þórhallsson, formaður knattspyrnudeildar Grindavíkur, í samtali við íþróttadeild.

Hlutaskiptakerfi sjómanna

Grindvíkingar þurftu að lækka laun leikmanna verulega og hætta að borga þeim allt árið um kring eftir fallið 2012.

„Það er himinn og haf á milli launa hjá leikmönnum núna og þegar við vorum síðast í Pepsi-deildinni. Þegar við féllum settum við alla leikmenn á níu mánaða greiðslu og lækkuðum launin um 35 prósent. Við tókum upp kerfi sem ég kalla hlutaskiptakerfi sjómanna,“ segir Jónas, en að þessu sinni fá leikmenn bónus fyrir að komast upp um deild.

„Þetta er í kringum 5-6 milljónir sem dreifist á 18 leikmenn,“ segir Jónas Þórhallsson.

Ef farið er milliveginn og reiknað með að heildarupphæðin séu 5.500.000 krónur fær hver og einn leikmaður 300.000 króna bónus í sinn hlut fyrir að vinna sér aftur inn sæti í Pepsi-deildinni.

Alla fréttina sem birtist í kvöldfréttum Stöðvar 2 í gærkvöldi má sjá í spilaranum hér að ofan.