Fengu glaðning frá toppliðinu eftir góðan árangur í stærðfræði

„Strákarnir eru miklir fótboltagarpar og þessi hugmynd kom upp í kollinn á mér. Það verður að segjast að þeir hafa svarað þessari aðferð ágætlega,“ segir Eysteinn Húni Hauksson í samtali við Vísi. Eysteinn hefur að undanförnu kennt drengjum í 6. bekk Heiðarskóla með óvenjulegri aðferð sem vakið hefur lukku.

Í fyrsta tíma ákváðu drengirnir að þeir ætluðu sér að vera „Leicester stærðfræðinnar“ og koma öllum á óvart með miklum dugnaði og framförum. Þar eiga þeir við refina frá Leicester en liðið trónir á toppi ensku úrvalsdeildarinnar þrátt fyrir að flestir hafi spáð þeim erfiðu gengi fyrir tímabilið.

Í hverjum tíma bregða nemendurnir sér í hlutverk Leicester og etja kappi við annað lið í úrvalsdeildinni. Kennarinn leggur fyrir þá ákveðið verkefni sem þeir þurfa á leysa úr innan ákveðins tímaramma. Strákarnir sem um ræðir eru fæddir árið 2004 og æfa með 5. flokki Keflavíkur.

„Þeir þurfa að bera saman bækur sínar og spá í hlutunum. Þeir reikna úr dæminu og verða að ræða saman og spá aðeins í þessu til að komast að sameiginlegri niðurstöðu. Á endanum verða þeir að sættast á eitt svar og sé það rétt fær Leicester eitt stig á töfluna. Sé svarið hins vegar rangt fær hitt liðið stig,“ segir Eysteinn. Hann bætir því við að andstæðingarnir fái einnig stig ef nemendurnir eru að ræða hluti sem tengjast ekki námsefninu eða að sóa tíma á annan hátt.

Fengu sendan glaðning að utan

Samkvæmt frétt á vef skólans hefur aðferðin virkað feyki vel. Leicester, undir stjórn strákanna, hefur til að mynda sigrað Liverpool, Norwich, Arsenal sem og stórlið Real Madrid í vináttuleik. Jafntefli náðist gegn Tottenham en eina tapið kom eftir hörkurimmu við Manchester United.

„Þetta með fánann var síðan önnur hugmynd sem ég ákvað að láta reyna á,“ segir Eysteinn. „Mér datt í hug að Leicester liðið gæti haft gaman af einhverju svona svo ég ákvað að senda línu á netfang sem ég rakst á. Þar spurði ég hvort þá langaði ekki að senda strákunum einhverja litla hvatningu.“

Sú bón skilaði í aðeins meiru en Eysteinn átti von á því fyrir skemmstu barst honum fáni með merki liðsins sem var áritaður af öllum leikmönnum þess. Hann mætti síðan með fánann í tíma og hangir hann nú í kennslustofunni. Til stendur einnig að mynd af strákunum birtist í leikskrá liðsins fyrir leik í ensku úrvalsdeildinni.

„Það er frábært að fulltrúi félagsins hafi gefið sér tíma til að gleðja nokkra stráka á Íslandi. Þegar þú hugsar út í það þá er Leicester, eins og staðan er í dag, eitt af bestu liðum heimsins. Þetta er toppliðið í ensku deildinni. Það hefur verið gaman að fylgjast með því og sjá að það er enn smá rómantík í fótboltanum sem snýst að allt of miklu leyti um peninga.“

„Þetta var í upphafi til gamans gert en þetta hefur eflt strákana og hvatt þá áfram. Ég tel þó ólíklegt að þessi aðferð virki nema nemendurnir hafi brennandi áhuga á knattspyrnu,“ segir Eysteinn að lokum.