Skálmöld til Evrópu

Snæbjörn Ragnarsson og félagar í Skálmöld eru lagðir af stað í tveggja vikna tónleikaferð um Suður-Evrópu.

Fyrstu tónleikarnir verða í spænsku borginni Bilbao í kvöld. Eftir það verður förinni heitið til Portúgals, Spánar, Frakklands, Ítalíu, Grikklands, Búlgaríu og Rúmeníu, þar sem lokatónleikarnir verða haldnir.

Með í för verða hljómsveitirnar Eluveitie frá Sviss og Wind Rose frá Ítalíu. Síðasta tónleikaferð Skálmaldar um Evrópu stóð yfir í einn og hálfan mánuð undir lok síðasta árs og gekk eins og í sögu. Hljómsveitin er að fylgja eftir plötunni Með vættum sem kom út í fyrra.