Beitir fylgir Þorvaldi til Keflavíkur

Markvörðurinn Beitir Ólafsson hefur söðlað um og mun leika með Keflavík næstu tvö árin.

Beitir hefur varið mark uppeldisfélagsins HK undanfarin fjögur ár en hann hefur á þeim tíma aðeins misst af tveimur deildarleikjum.

Hjá Keflavík hittir Beitir fyrir Þorvald Örlygsson en hann þjálfaði HK 2014 og 2015. Kópavogsliðið endaði í 8. sæti 1. deildarinnar í fyrra.

Beitir mun berjast um markvarðastöðuna hjá Keflavík við hinn efnilega Sindra Kristinn Ólafsson sem lék 14 leiki með liðinu í Pepsi-deildinni í sumar. Keflvíkingar fengu aðeins 10 stig á síðasta tímabili og féllu úr Pepsi-deildinni eftir 12 ára samfellda dvöl þar.

HK hefur orðið fyrir mikilli blóðtöku í haust en liðið missti m.a. sinn aðalmarkaskorara, Guðmund Atla Steinþórsson, til Breiðabliks.