Gregg Ryder þjálfar Þrótt til ársins 2017

Gregg Ryder mun stýra Þrótturum í Pepsi-deildinni næsta sumar en hann var að framlengja samning sinn við Þróttara til 2017.

Gregg Ryder er 27 ára gamall og kom fyrst til landsins sem aðstoðarþjálfari Hermanns Hreiðarssonar hjá ÍBV. Ryder hafði áður starfað hjá Newcastle United.

„Það þarf ekki að eyða mörgum orðum um hversu mikilvægur Gregg er Þrótti, en við gerum það samt. Hann tók við Þrótti fyrir tímabilið 2014, ungur metnaðarfullur þjálfari sem þurfti tækifæri. Hann fékk traustið hér í Laugardalnum og hann hefur ekki litið til baka. Hans áferð komst fljótt á liðið,  liðið átti gott sumar 2014 ennþá betra 2015 og við Þróttarar erum fullir tilhlökkunar fyrir komandi sumar í deild hinna bestu," segir í fréttatilkynningu frá Þrótturum.

Ryder tók við liði Þróttar eftir 2013-tímabilið þar sem liðið var einu sæti frá falli úr deildinni. Liðið endaði í 3. sæti á fyrsta árinu hans og komst síðan upp í Pepsi-deildina í sumar.

"Gregg hefur sannfært félagið og mig á mínum stutta tíma hjá Þrótti að hann er mjög efnilegur þjálfari. Hann vinnur hörðum höndum að því að gera Þrótt að betra og sterkara félagi í víðu samhengi. Hann vinnur núna hörðum höndum að því að samstilla leikstíl, aðferðir og vinnulag allra þjálfara í félaginu," segir Per Rud, nýr yfirmaður knattspyrnumála hjá Þrótti, um nýja samninginn í fréttatilkynningu frá Þrótturum.

„Ég er mjög ánægður með að hafa skrifað undir nýjan samning við Þrótt og að fá að vera með þessum frábæru leikmönnum í tvö ár í viðbót. Ég er mjög spenntur fyrir framtíðinni og að sjá félagið fara í Pepsi-deildina á næsta ári," sagði Gregg Ryder í viðtalinu í fréttatilkynningunni.

„Metnaður þess félags sem ég vinn fyrir skiptir mestu máli fyrir mig persónulega og ég hef fengið frábær skilaboð um hann með þeim starfsmönnum og leikmönnum sem eru komnir til félagsins. Félagið mun síðan halda áfram að styrkja sig til að ná því að verða gott Pepsi-deildar lið á næsta ári. Það eru spennandi tímar framundan hjá Þrótti," sagði Ryder ennfremur.