Reykjavíkurborg vill ritskoða Hraðfréttir

Gamanþáttur RÚV, Hraðfréttir, var á vettvangi með tökulið sitt þegar Skrekkur fór fram nú í vikunni. Í kjölfarið hafði sviðsstjóri hjá Reykjavíkurborg, Soffía Pálsdóttir forstöðumaður frístundasviðs, samband við Skarphéðinn Guðmundsson dagskrárstjóra innlendrar dagskrárgerðar og fór fram á að tilteknar tökur yrðu ekki notaðar í þættinum.

Gísli Marteinn mesti óvinur landsbyggðarinnar

Málið var til umfjöllunar hjá RUV í gær en atriðið sem um ræðir er það að Hraðfréttamenn ávörpuðu troðfullan salinn í Borgarleikhúsinu, en Skrekkur er hæfileikakeppni grunnskóla Reykjavíkurborgar, og spurðu: Hver er helsti óvinur landsbyggðarinnar?

„GÍSLI MARTEINN!“ hrópuðu grunnskólabörnin, vel með á nótunum. Þetta er vitaskuld með vísan til frétta um viðbrögð landsbyggðafólks við umdeildu tísti sjónvarpsmannsins Gísla Marteins Baldurssonar.

 

Þakið ætlaði af húsinu

„Stundum er sagt í leikhúsunum að þakið hafi ætlað að rifna af húsinu. En, Skrekkur er dásamlegt sjónvarpsefni. Og algerlega magnað að heyra fólk á gunnskólaaldri, í troðfullu Borgarleikhúsi, öskra Gísli Marteinn,“ segir Gunnar Sigurðarson Hraðfréttamaður í samtali við Vísi.

Tökurnar voru hugsaðar í dagskrárliðinn Fannar á vettvangi en þeir voru þarna þrír á ferð, Gunnar, Fannar Sveinsson og Benedikt Valsson auk Steineyjar Skúladóttur. Og var mikil stemmning meðal krakkanna og ekki síst fyrir þessu tiltekna atriði.

Verða við kröfum Reykjavíkurborgar

„En, svo fengum við einhvern trylling vegna þessa í gær. Ég ræddi við Soffíu og hún sagði að ég mætti ekki sýna þetta. Mér finnst skrítið að einhver sviðstjóri hjá borginni vilji segja fólki hvað megi og ekki í þessum efnum. Ég veit ekki hvað er fössið? Það er enginn æsingur af okkar hálfu. En, ég skil þeirra afstöðu að halda að grínþáttur sé að grínast eitthvað og að krakkarnir hafi ekki vitað að þetta væru Hraðfréttir heldur alvarleikinn uppmálaður,“ segir Gunnar fremur háðskur í bragði.

„Krakkarnir sem þarna voru höfðu gaman að þessu. Sjálfur á ég fjögur börn og skil þetta ekki alveg. En, við nennum ekki að hafa Reykjavíkurborg og einhverja skólastjóra grenjandi á bakinu. Þá gerum við bara eitthvað annað. En, þetta er leiðinlegt fyrir krakkana. Örugglega fullt af krökkum sem eru spennt að sjá sig í Hraðfréttum,“ segir Gunnar sem vill meina að þetta setji þáttagerðina ekki í uppnám, af nægu efni sé að taka. Og Gísli Marteinn verði þá bara tekin öðrum tökum.

Gunnar Hraðfréttamaður segir að hafi þetta farið fyrir brjóstið á einhverjum þá verði þessu bara breytt og ekkert mál með það. „Við nennum ekki einhverju röfli. Borgarlögmaður getur slakað á – ég myndi alltaf sigra lögfræðilegan debatt ef hann vildi fara í slíkt. Allur rétturinn er okkar megin en virðingin og kurteisin líka, annað en Reykjavíkurborg.“

Vísir vildi leita viðbragða hjá Soffíu Pálsdóttur, sem skráð er í bókum Reykjavíkurborgar sem skrifstofustjóri frístundastarfs – fagskrifstofa, við þessum tíðindum en samkvæmt upplýsingum er hún upptekin á fundum í allan dag, fullbókuð til klukkan fimm í dag.