Enginn í Berlín hefur tekið fleiri sóknarfráköst en Hlynur

Hlynur Bæringsson, fyrirliði íslenska körfuboltalandsliðsins, hefur verið öflugur í sóknarfráköstunum í fyrstu fjórum leikjum íslenska liðsins á Evrópumótinu.

Hlynur er eins og er í sjötta sæti yfir flest tekin sóknarfráköst að meðaltali í leik af leikmönnum allra fjögurra riðlanna.

Hlynur hefur alls tekið 11 sóknafráköst í þessum fjórum leikjum sem gera 2,8 að meðaltali í leik.

Hlynur er ekki að fá skráð öll sóknarfráköst sín því það virðist sem það sé ekki skráð á hann sóknarfrákast þegar hann blakar boltanum út til liðsfélaga.

Enginn leikmaður í B-riðlinum í Berlín hefur samt tekið jafnmörg sóknarfráköst og íslenski landsliðsfyrirliðinn en í öðru sæti eru NBA-leikmennirnir Pau Gasol hjá Spáni og Danilo Gallinari hjá Ítalíu.

Tékkinn Jan Vesely og Grikkinn Kostas Koufos hafa tekið flest sóknarfráköst í fyrstu fjórum umferðum riðlakeppninnar eða alls sextán sem gera 4,0 að meðaltali í leik.

Hlynur átti sinn besta leik í sóknarfráköstum á móti Spáni í gær en hann náði þá alls fimm sóknafráköstum. Hlynur hafði tekið tvö sóknarfráköst í öllum hinum þremur leikjunum eða á móti Þýskalandi, Ítalíu og Serbíu.

Hlynur Bæringsson er með 10,5 stig og 6,8 fráköst að meðaltali í fyrstu fjórum leikjum sínum á Evrópumótinu.