Rosberg fljótastur á föstudagsæfingum

Nico Rosberg á Mercedes var fljótastur á báðum æfingum dagsins, hann byrjaði illa á fyrri æfingunni. Seinni æfing hans endaði skyndilega þegar dekk sprakk á mikilli ferð.

Rosberg var 0,242 sekúndum hraðari en liðsfélagi sinn, Lewis Hamilton á fyrri æfingunni. Rosberg missti vélarafl í upphafi æfingar en náði að hrista það af sér. Hann var síðastur til að setja tíma.

Daniel Ricciardo á Red Bull varð þriðji, þrátt fyrir spá liðsins að helgin í Belgíu gæti orðið ein af erfiðari helgum ársins.

Kimi Raikkonen á Ferrari varð fjórði á undan Sebastian Vettel einnig hjá Ferrari. Pastor Maldonado á Lotus keyrði utan í varnarvegg eftir að hafa misst stjórn á bíl sínum.

Staða þriggja hröðustu manna breyttist ekki á milli æfinga. Daniil Kvyat á Red Bull varð fjórði á seinni æfingunni og Raikkonen fimmti, jafn Nico Hulkenberg á Force India.

Rosberg var 0.302 sekúndum fljótari en Hamilton. Afturdekk sprakk á mikilli ferð á bíl Rosberg sem snérist í kjölfarið á ógnar hraða. Bíllinn nam staðar rétt áður en hann endaði á varnarvegg svo hann skemmdist lítið sem ekkert.

Marcus Ericsson á Sauber missti stjórn á bíl sínum skömmu á eftir Rosberg en hann lenti á varnarvegg á miklum hraða.

Tímatakan verður í beinni útsendingu á Stöð 2 Sport klukkan 11:50 í fyrramálið. Bein útsending frá keppninni á Spa hefst á Stöð 2 Sport klukkan 11:30 á sunnudag.

Hér fyrir neðan má sjá úrslit dagsins og helstu úrslit helgarinnar sem uppfærast eftir því sem helgin líður.