Samkomulag í höfn í Grikklandi

Gríska ríkið hefur náð samkomulagi við alþjóðlega lánadrottna sína um skuldavanda landsins. Um er að ræða þriggja ára fjárhagsáætlun sem kemur til með að forða Grikkjum frá gjaldþroti og halda þeim inni í evrusamstarfinu.

Grikkir þurfa að koma á ýmsum efnahagsumbótum í landinu en unnið er að því að útfæra einstök smáatriði áður en þingið greiðir atkvæði um samninginn. Samningurinn kveður meðal annars á um að ríkisstjórnin skili 0,25 prósent halla á útgjöldum ríkissjóðs í ár og að hún skili tekjuafgangi upp á 0,5 prósent á næsta ári.

Árið 2017 þurfa stjórnvöld svo að skila 1,75 prósent tekjuafgangi og 3,5 árið 2018. Með samkomulaginu ættu Grikkir að geta fengið þriðju útborgun af neyðarláni, sem mun gera þeim kleift að greiða Seðlabanka Evrópu 3,4 milljarða evra lán, jafnvirði 500 milljarða íslenskra króna, hinn 20. ágúst næstkomandi.