Sigmundur Már dæmir í riðli EM sem fer fram í Lettlandi

Njarðvíkingurinn Sigmundur Már Herbertsson hefur nú fengið að vita hvar hann mun dæma á Evrópukeppninni í haust en þá á Ísland bæði fulltrúa meðal leikmanna og dómara. KKÍ segir frá þessu í dag.

Sigmundur Már mun dæma í Riga í Lettlandi þar sem allar þrjár Eystrasaltsþjóðirnar mætast meðal annars. Einnig eru Úkraína, Belgía og Tékkland í riðlinum sem fer fram í umsjón Letta.

Með Sigmundi dæma Amit Balak frá Ísrael, Ilija Belosevic frá Serbíu, Marcin Kowalski frá Póllandi, Milivoje Jovcic frá Serbíu, Saverio Lanzarini frá Ítalíu, Eddie Viator frá Frakklandi, Emin Mogulkoc frá Tyrklandi, Petar Obradovic frá Bosníu Hersegóvínu og Emilo Perez frá Spáni.

Eftirlitsmaður verður Íslandsvinurinn Jan Holmin frá Svíþjóð og FIBA þjálfarar verða Alessandro Teofili og Alejandro Vaquera.

Sigmundur mun verða á fullu í ágúst að undirbúa sig fyrir mótið og dæma landsleiki víða um Evrópu. Hann er fyrsti íslenski dómarinn sem dæmir í úrslitakeppni stórmóts fullorðinna og er þetta mikil viðurkenning fyrir hann sem, íslenska dómara og íslenskan körfubolta.

Sigmundur Már Herbertsson var kosinn besti dómari Dominos-deildarinnar í vor en þetta var í níunda sinn sem hann er kosinn besti dómari ársins.