Stytti sér leið á lokasprettinum en úrslitin munu standa

ÍR-ingar funduðu í gær með forsvarsmönnum Frjálsíþróttasambands Íslands vegna endasprettsins í Víðavangshlaupi ÍR sem fram fór á Sumardaginn fyrsta. Arnar Pétursson úr ÍR hafði betur eftir harða baráttu við Ingvar Hjartarson úr Fjölni. Munaði einni sekúndu. Niðurstaða fundarins er sú að ekki er forsenda til að breyta úrslitunum og verður Arnar því áfram sigurvegari í hlaupinu.

Sjá einnig:Yfirlýsing frá ÍR-ingum vegna málsins

Ingvar veitti því ekki sjálfur athygli en myndband sem birt hefur verið af lokasprettinum sýnir glögglega að Arnar hljóp yfir steyptan kant á lokametrunum og stytti leið sína þannig.

Í samtali við DV segist Ingvar ekki hafa tekið eftir þessu fyrr en að hlaupinu loknu þegar áhorfendur bentu honum á málið. Hann hafi ekki viljað vera með leiðindi á staðnum og ákveðið að velta málinu fyrir sér hvort hann ætti að kæra. Síðar komst hann að því að hann hefði aðeins hálftímann að hlaupinu loknu til að kæra.

Myndband af lokasprettinum má sjá hér að neðan.

Má stytta sér leið í svona götuhlaupi?????

Posted by Óskar Hlynsson on Monday, April 27, 2015

Víðavangshlaup ÍR-inga er einnig Íslandsmótið í 5 kílómetra götuhlaupi. Því gilda alþjóðlegar reglur og leituðu ÍR-ingar því álits frá FRÍ í gær.

Þráinn Hafsteinsson, yfirþjálfari frjálsíþróttadeildar ÍR, segir í samtali við Vísi að von sé á yfirlýsingu frá ÍR vegna málsins. Niðurstaða fundarins í gær hafi verið sú að ekki séu forsendur til að breyta neinu er varði úrslitin. Arnar sé sigurvegari hlaupsins og Ingvar í öðru sæti. Rökin ásamt áliti FRÍ mun fylgja yfirlýsingu ÍR-inga.

Ingvar segir í samtali við DV að úrslitin muni haf mikil áhrif á val á mótum í sumar. Hann hafi verið að vonast eftir því að keppa fyrir Íslands hönd á Smáþjóðaleikunum.

„Þar er keppt í 5 og 10 kílómetra hlaupi og hefur Kári Steinn Karlsson iðulega farið fyrir hönd Íslands á leikanna síðustu ár. Þar sem þeir eru haldnir á Íslandi í sumar fá tveir að taka þátt í hverri grein. Sigurvegari Víðavangshlaups ÍR á að vera sá sem keppir ásamt Kára Steini,“ segir Ingvar í samtali við DV.

Endurtekið efni

Athygli vekur að um annað skiptið á innan við ári er Arnar sakaður um svindl í hlaupi. Arnar, sem kom fyrstur Íslendinga í mark í Reykjavíkurmaraþoninu síðastliðið sumar, var sakaður um að hafa notið aðstoðar hjólreiðarmanna.

Áfrýjunardómstólll Íþrótta- og ólympíusambands Íslands vísaði hins vegar málinu frá þar sem það þótti ekki rétt undribúið til meðferðar. Yfirdómnefnd maraþonsins og dómstóll ÍSÍ höfðu áður vísað málinu frá vegna þess að ekki þótti sannað að Arnar hefði svindlað.

Nánar um málið hér.