Innlent

Svona grín gera menn ekki, sagði Össur 2009

Kristján Már Unnarsson skrifar

Þrír ráðherrar Samfylkingarinnar, með Össur Skarphéðinsson í fararbroddi, voru í lykilstöðum við að hrinda af stað olíuleit á Drekasvæðinu. Sömu einstaklingar sitja allir enn á þingi fyrir Samfylkinguna, sem samþykkti um helgina að stefna í þveröfuga átt. Forsaga málsins var rifjuð upp í fréttum Stöðvar 2 í kvöld.



Þótt Alþingi hafi markað stefnuna með lögum um kolvetni árið 2001 var það iðnaðarráðherrann Össur sem hratt olíuleitinni af stað í Orkustofnun með fyrsta útboðinu í janúar 2009.



„Þetta er einn af sóknarfleygunum inn í framtíðina,“ sagði hann við það tækifæri og  fundaði um sama leyti með íbúum á Vopnafirði og Þórshöfn um þjónustumiðstöð.



„Ég er kominn hingað til þess að segja heimamönnum það að ég sé bjartsýnn og að ég leggi kapp á að menn ráðist í þetta og ég muni styðja þessa viðleitni til að byggja þessa þjónustumiðstöð hér,“ sagði Össur á tröppum félagsheimilisins á Vopnafirði.



Þegar umhverfisráðherrann Kolbrún Halldórsdóttir vildi hætta við, og Steingrímur J. Sigfússon var í vandræðum með að útskýra hvort ákvörðun um að leyfa olíuleit væri jafnframt ákvörðun um að leyfa olíuvinnslu, var svar Össurar:



„Menn fara ekki í það að bjóða út leyfi, sem fyrirtæki á alþjóðavísu væntanlega taka upp og hyggjast eyða tugum, jafnvel hundruð milljarða í að leita að olíu þarna á mjög erfiðu svæði, til að segja síðan við þau: Nei, heyrðu. Þetta var allt saman grín. Við vorum bara svona að skoða þetta. Nei, að sjálfsögðu ekki.“



Katrín Júlíusdóttir var tekin við olíumálunum í iðnaðarráðuneytinu þegar fyrstu umsóknir voru opnaðar í maí 2009 og þá var ekkert hik:



„Við höldum áfram alveg ótrauð í þessum leiðangri og auðvitað munum við gæta ítrustu umhverfiskrafna,“ sagði Katrín.



Oddný Harðardóttir var þriðji iðnaðarráðherra Samfylkingarinnar sem fylgdi málinu eftir, sat meðal annars ráðstefnu olíumálaráðherra og olíuforstjóra um olíuleit á Norðurslóðum, og fagnaði svo umsóknum í útboði númer tvö í apríl 2012. Hún sagði mörg tækifæri fylgja olíurannsóknum og olíuvinnslu, bæði uppbygging og atvinna.



Steingrímur J. Sigfússon var iðnaðarráðherra þegar fyrstu sérleyfin voru afhent í janúar 2013. Hann varði olíuleitina á alþjóðavettvangi, sagði til dæmis erlendum fréttamönnum á Norðurslóðaráðstefnu í Tromsö í sama mánuði að það yrði stór ákvörðun ef Ísland eitt ríkja ætlaði ekki að leyfa olíuleit.



Össur sem utanríkisráðherra beitti áfram áhrifum sínum, skálaði við olíumálaráðherra, en kannski gætu vegið þyngst samskiptin við Kínverja. Sex vikum eftir fræga Kínaheimsókn Jóhönnu Sigurðardóttur forsætisráðherra og Össurar í apríl 2013, með undirritun fríverslunarsamnings, var tilkynnt að kínverskt ríkisolíufélag myndi leiða olíuleitina á Drekasvæðinu.

Alþingi Olíuleit á Drekasvæði Samfylkingin

Tengdar fréttir

Risahöfn og olíuiðnaður inn á skipulag Langanesbyggðar

Skipulagsstofnun hefur fallist á aðalskipulag Langanesbyggðar sem gerir ráð fyrir risahöfn í Finnafirði og lóðum undir olíu- og gasiðnað og bíður það nú staðfestingar umhverfisráðherra. Sveitarstjórnarmenn á Norðausturlandi hafa lengi horft til þeirra tækifæra sem siglingar yfir Norðurheimskautið og olíuleit gætu skapað og komu stórskipahöfn í Gunnólfsvík við Langanes inn á aðalskipulag fyrir átta árum.

Oddný komin í hóp olíumálaráðherra og olíuforstjóra

Oddný Harðardóttir iðnaðarráðherra er fulltrúi Íslands á ráðherrafundi um olíuleit á Norðurslóðum, sem fram fer í Þrándheimi í Noregi í dag. Olíu- og orkumálaráðherrar ríkja við Norðurskautið eru meðal þátttakenda á fundinum ásamt fulltrúum stærstu olíufyrirtækja heims, eins og ExxonMobil, BP, Statoil, Gazprom, ConocoPhilips og Shell.

Tveir hópar olíufélaga á Drekasvæðið í sumar

Kanadíska olíufélagið Ithaca hefur ákveðið að senda rannsóknarskip á Drekasvæðið til endurvarpsmælinga í sumar. Kínverska félagið CNOOC hefur einnig staðfest sömu áform.

Á móti olíuvinnslu á Drekasvæðinu

Vinstri grænir leggjast gegn olíuleit á Drekasvæðinu. Kolbrún Halldórsdóttir umhverfisráðherra kallar Drekaútboðið óðagotsaðgerð, - olíuvinnsla samrýmist hvorki stefnu um sjálfbæra nýtingu orkulinda né skuldbindingum Íslands á alþjóðavettvangi.

Steingrímur varði olíuleit Íslendinga í Tromsö

Sjávarútvegsráðherra Noregs segir að þar í landi hafi það sýnt sig að fiskveiðar og olíuleit geti vel farið saman. Á Norðurslóðaráðstefnunni í Tromsö, sem lauk í gær, varði Steingrímur J. Sigfússon atvinnuvegaráðherra þá ákvörðun Íslendinga að hefja olíuleit með því að aðrar þjóðir við Norður-Atlantshaf gerðu slíkt hið sama. Í ræðu um olíuáform Íslands sagði Steingrímur að fyrst yrði að tryggja strangar varnir gegn mengun og slysum áður en nokkur olíuvinnsla yrði hugsanlega leyfð. Fréttamönnum sagði hann síðan að það yrði stór ákvörðun ef Ísland eitt ríkja ætlaði ekki að leyfa olíuleit.

Þriðja olíuleitarleyfið á Drekann veitt í dag

Þriðja sérleyfinu til leitar og vinnslu olíu á Drekasvæðinu verður formlega úthlutað við athöfn sem hefst núna klukkan tvö í Þjóðmenningarhúsinu í Reykjavík.

Treglega gekk að draga út svar frá Steingrími um olíuvinnslu

Steingrímur J. Sigfússon segir Vinstri græna hlynnta rannsóknum á Drekasvæðinu. Fréttamaður þurfti hins vegar að ítreka spurningu sex sinnum áður en svar fékkst við því hvort flokkurinn styddi olíuvinnslu á svæðinu og hvort hún samrýmdist hugmyndafræði flokksins.

Fyrsti olíurisinn sem sækir um Drekann

Kínverska ríkisolíufélagið CNOOC ("sínúkk") er fyrsti olíurisinn sem sækir um Drekasvæðið og vonast ráðamenn Eykons Energy til að innkoma hans kveiki áhuga annarra risaolíufélaga heimsins á íslenska landgrunninu.

Mest lesið


Fleiri fréttir

Sjá meira


×

Mest lesið