Viðbúnaður á Keflavíkurflugvelli vegna titrara

Lögreglan á Suðurnesjum þurfti nýverið að rannsaka tösku í Flugstöð Leifs Eiríkssonar sem verið var að ferma um borð í flugvél á leið til London. 

Taskan þótti grunsamleg þar sem hún var öll á iði. Í tilkynningu frá lögreglunni segir að erlend kona hafi veitt lögreglunni leyfi til að opna töskuna.

Gaf þá að líta tæki sem konur hafa stundum við höndina sér til yndisauka, svokallaðan titrara, sem hrokkið hafði í gang. Var slökkt á tækinu og taskan sett um borð að því búnu.

„Atvik af svipuðu tagi eiga sér alltaf öðru hvort stað á Keflavíkurflugvelli og er flugfarþegum bent á að ganga þannig frá rafmagnstækjum, svo sem rakvélum, tannburstum og öðru slíku að þau geti ekki hrokkið í gang við minnsta núning eða högg,“ segir í tilkynningu frá lögreglunni.