Ricciardo fljótastur á öðrum degi

Daniel Ricciardo á Red Bull var maður dagsins á öðrum æfingadegi í Barselóna. Æfingar standa þar yfir fyrir komandi tímabil í Formúlu 1.

Ricciardo var bæði fljótastur og ók manna lengst hann ók 143 hringi um Katalóníubrautina. Tími hans var 1:24,574, aðeins 0,01 sekúndu á eftir honum var Kimi Raikkonen á Ferrari.

Miklar framfarir eru greinilegar á milli ára. Best má sjá það á því að ráspólstími Lewis Hamilton í spænska kappakstrinum í fyrra, sem fram fór á Katalóníubrautinni var 1:25,232.

Besti tími Hamilton í dag var 1:24,923, líklega á mjög þungum bíl, fullum af eldsneyti og jafnvel ekki á fullu afli. Hamilton og liðsfélagi hans hjá Mercedes, Nico Rosberg óku báðir í dag. Rosberg átti að aka samkvæmt áætlun en þorði ekki að aka meira vegna hálsmeiðsla sem hafa verið að hrjá hann. Hamilton tók því við, en hann gat ekið mjög takmarkað í gær vegna hitavellu.

McLaren liðið átti sinn besta dag á æfingum ársins til þessa í dag. Fernando Alonso varð sjöundi og ók 59 hringi, reyndar minnst allra en það er þó alls ekki slæmt.

Línurnar eru aðeins farnar að skýrast um hvernig liðin koma undan vetri. Hingað til virðist ljóst að Ferrari hefur náð hvað mestum framförum, að frátöldu Lotus liðinu.

Lotus ók eiginlega ekkert fyrir tímabilið í fyrra en átti svo besta tíma dagsins í gær og átti ágætis dag í dag. Munurinn á sex hröðustu bílunum í dag var innan við sekúnda. Það má því búast við að framundan gæti verið spennandi tímabil.