Gunnar Magg: Frakkar með frábært lið en alls ekki ósigrandi

Gunnar Magnússon aðstoðarþjálfari landsliðsins gegnir þýðingarmiklu hlutverki í liðinu. Hann situr lengi fram eftir nóttu við að klippa myndir úr leikjum.  Hann býr yfir mikilli þekkingu á næsta mótherja.  En hversu góðir eru Frakkar?

„Þeir eru með frábært lið en alls ekki ósigrandi.  Þeir bæta sig með hverjum leik í keppninni og að mæta þeim svona snemma í keppninni gefur okkur bara aukna möguleika.  Daniel Narcisse er væntanlega ennþá meiddur og það veikir þá aðeins.  Miðað við síðustu ár eru þeir ekki jafn sterkir og á síðustu mótum að minnsta kosti enn sem komið er," segir Gunnar Magnússon í viðtali við Arnar Björnsson.

Íslendingar töpuðu fyrir Frökkum í sextán liða úrslitum á HM á Spáni í hörkuleik sem Frakkar unnu 30-28.  Gunnar segir að Frakkar séu ekki jafn sterkir í dag.  „En þeir bæta sig yfirleitt þegar líður á keppnina og eru bestir síðustu helgina þegar þeir eru að klára mótin.  Leikur okkar við þá á HM fyrir tveimur árum gat endað á hvorn veginn sem var.  Við unnum þá á Ólympíuleikunum í London og einnig árið 2007 í Magdeburg þannig að við höfum unnið þá áður á stórmóti og þeir eru alls ekki ósigrandi," segir Gunnar.

Hvar eru veikleikar þeirra?

„Það mæðir mikið á Karabatic í sókninni og hann er sá sem dregur vagninn, sérstaklega þegar á móti blæs.  Ef við náum að halda okkar aga í sóknarleiknum og Omeyer lokar ekki markinu og náum að koma okkur í vörnina þá eigum við góðan möguleika," sagði Gunnar en það er hægt að horfa á allt viðtal Arnars við hann hér fyrir neðan.