Finnur um Jón Arnór: Algjörlega laus við alla stæla

Jón Arnór Stefánsson var valinn íþróttamaður ársins 2014 af Samtökum íþróttafréttamanna. Fréttablaðið fékk þrjá KR-þjálfara sem þekkja kappann vel til þess að segja sína skoðun á þessum frábæra leikmanni.

Finnur Freyr Stefánsson, þjálfari Íslandsmeistara KR, er aðstoðarþjálfari landsliðsins og vann með Jóni Arnóri að því að koma Íslandi á Evrópumótið 2015.

„Það er hægt að telja upp ótal kosti sem Jón Arnór hefur enda frábær íþróttamaður og sönn fyrirmynd sem hefur rutt brautina fyrir körfuboltann á Íslandi og gefið ungum leikmönnum von og trú á að komast áfram í íþróttinni," segir Finnur.

„Þó svo að margir hans kostir séu vel sjáanlegir á vellinum þá er tvennt sem maður hefur tekið eftir í gegnum tíðina. Annars vegar þessi rólega ára sem honum fylgir og hins vegar aðlögunarhæfni hans. Þrátt fyrir að vera skærasta stjarnan þá mætir hann alltaf inn á gólfið sem einfaldlega einn af strákunum, algjörlega laus við alla stæla. Hann er trúr sínu og heldur fast í ræturnar hérna heima," segir Finnur.

„Jón Arnór hefur sýnt það í gegnum ferilinn að hann getur aðlagast vel þeim aðstæðum sem hann er í hverju sinni og því náð að festa sig í sessi í mörgum bestu deildum heimsins. Því miður virðist það vera fast í okkur að hampa alltaf þeim sem skora mest en íþróttalið snúast ekki bara um að skora heldur eru aðrir þættir nauðsynlegir fyrir lið til að ná árangri," segir Finnur.

„Þetta veit Jón og í stað þess að reyna að baða sig alltaf í sviðsljósinu hefur hann tekið sín hlutverk og skilað þeim af sér í heimsklassa. Hvort sem það er varnarleikur eða annað þá hefur Jón sýnt það að hann á heima meðal þeirra bestu," segir Finnur að lokum.