Haltrandi inn í milliriðilinn

Lokatölurnar í gær voru ansi kunnuglegar. 27-27 voru lokatölurnar gegn Ungverjum á ÓL rétt eins og í gær. Nú var aftur á móti engin framlenging og liðin skiptu því með sér stigunum.

Það var langt frá því að vera sami kraftur í íslenska liðinu í upphafi þessa leiks og gegn Noregi. Ekki sama vinnsla né brjálæði í gangi. Markvarslan var fyrir vikið nákvæmlega engin. Gabor Ancsin, sem leysti Laszlo Nagy, af hólmi fór mikinn í sóknarleiknum og Ungverjar voru með fjögurra marka forskot, 4-8, eftir tíu mínútur.

Þá kom Bjarki Már Gunnarsson í vörnina í stað Vignis Svavarssonar og það breytti miklu. Vörnin hrökk í gírinn. Hún vann marga bolta og það fleiri en markverðirnir vörðu. Aron Rafn lét aðeins til sín taka eftir að það átti að skipta honum af velli. Björgvin byrjaði og náði ekki að verja skot.

Ótrúlega vel sloppið í hálfleik

Sóknarleikurinn var oft á tíðum fullhægur og strákarnir létu Mikler í marki Ungverja verja ellefu skot frá sér.

Þrátt fyrir nánast enga markvörslu, lélega nýtingu manni fleiri og mistækan sóknarleik var Ísland aðeins einu marki undir í hálfleik, 15-16. Það var ótrúlega vel sloppið og gaf ágætis fyrirheit fyrir seinni hálfleikinn. Strákarnir áttu mikið inni.

Seinni hálfleikur byrjaði mikið betur. Vörnin sterk sem fyrr og Aron komst í gang í markinu. Liðið fékk aðeins á sig eitt mark á fyrstu tíu mínútum síðari hálfleiks, skoraði fimm mörk í röð og komst yfir 20-17. Þá komu Ungverjar til baka og eftir það héldust liðin í hendur út leikinn.

Ísland fékk lokatækifæri til þess að klára leikinn en skot Ásgeirs Arnar Hallgrímssonar fór í vörnina og leiktíminn rann út skömmu síðar. Alls ekki nógu vel útfært hjá íslenska liðinu.

Ungverjar eru með hörkulið og spiluðu flotta vörn á okkar menn í gær. Engu að síður var svekkjandi að klára ekki leikinn þar sem tækifærið var fyrir hendi.

Það var algjörlega grátlegt að fylgjast með því hversu illa strákunum gekk að spila einum fleiri. Ungverjar voru út af í sextán mínútur og það nýttu þeir sér engan veginn. Það var blóðugt. Of fáir þorðu að taka af skarið.

Bjarki Már var frábær í leiknum. Hann kom inn eftir um tíu mínútur og batt vörnina saman en hún varði fjölda skota. Aron bar sóknarleikinn uppi allt of lengi. Ásgeir fann sig ekki nægilega vel og Rúnar hefði að ósekju mátt spila meira fyrir utan. Markvarslan var heldur ekki nógu góð.

Gríðarleg barátta og þrautseigja

Staðan var sú að við spiluðum með tvær laskaðar skyttur í gær, Aron og Arnór. Einnig var skytta í horninu þar sem Þórir meiddist snemma.

Liðið á hrós skilið fyrir gríðarlega baráttu og þrautseigju. Það var ekki sjálfgefið að það kæmist áfram í þessu móti og segir meira en margt um karakter liðsins að leikmenn séu þrátt fyrir það hundfúlir með að hafa ekki náð tveimur stigum.