Red Bull óttast meiri yfirburði Mercedes 2015

Red Bull liðið gerir ekki ráð fyrir að eiga roð í Mercedes á næsta tímabili. Red Bull telur að yfirburðir þýska risans verði líklega meiri en í þeir voru í ár.

Orðrómur er á kreiki um að Mercedes hafi fundið enn meira afl í V6 vél sinni. Christian Horner, keppnisstjóri Red Bull er hræddur um að keppinautar Mercedes verði nokkrum skrefum á eftir.

„Við erum ekki búin að afskrifa næsta ár, en ég veit að bilið er til staðar. Af orðrómum að dæma þá verður gríðarleg áskorun að minnka bilið í Mercedes,“ sagði Horner.

„Renault gæti komið fram með gjörbylta og endurbætta vél en ég efast um að hún hefði afl á við Mercedes vél nýliðins tímabils,“ bætti liðsstjórnn við.

Samkvæmt orðrómum um tilvonandi framfarir Mercedes hefur liðið fundið aukið afl sem samsvarar 50 - 70 hestöflum með ýmsum uppfærslum. Þeirra má vænta á næsta tímabili. Ef rétt reynist telur Horner að Mercedes muni drottna aftur á næsta tímabili. Hann telur að yfirburðir liðsins gætu jafnvel orðið enn meiri en þeir reyndust í ár.