Krafa um sóttkví hefur áhrif á Lækna án landamæra

Samtökin Læknar án landamæra segir að ákvörðun nokkurra ríkja í Bandaríkjunum um að skylda heilbrigðisstarfsmenn sem starfað hafa í Vestur-Afríkuríkjum þar sem ebólufaraldur hefur geisað til að vera í sóttkví eftir komu sína aftur til landsins sé farin að hafa áhrif á starf þeirra.

Fréttastofa Reuters greindi frá því á fimmtudag að stjórnendur Lækna án landamæra væru nú að skoða hvort hætta þurfi verkefnum sem samtökin hafa sinnt á svæðinu. Bandarískur læknir sem starfaði á vegum samtakanna var lagður inn á sjúkrahús í New York-borg í síðustu viku eftir að hafa greinst með ebólu. Í kjölfar þess ákváðu nokkur ríki að skylda heilbrigðisstarfsmenn sem unnið hafa með ebólusmituðum að fara í sóttkví.

Framkvæmdastjóri samtakanna, Sophie Delaunay, segir í skriflegu svari til Reuters að dæmi séu um að læknar hafi frestað heimkomu sinni til Bandaríkjanna og ákveðið að dvelja þess í stað í Evrópu í 21 dag en það er hámarkstími sem liðið getur frá smiti þar til að einkenni koma fram. Þá segir hún læknar innan samtakanna hafi fundið þrýsting frá fjölskyldum sínum að fara ekki til Afríku til að aðstoða vegna ebólufaraldursins.  

Ákvörðun ríkjanna um að skylda heilbrigðisstarfsmenn til að fara í sóttkví hefur verið harðlega gagnrýnd og bent á að engin vísindaleg rök séu á bakvið hana. Bannið nær yfir alla heilbrigðisstarfsmenn sem sinnt hafa störfum í ríkjum þar sem barist er við að hefta útbreiðslu veirunnar, jafnvel þó að staðfest hafi verið að viðkomandi séu ekki smitaðir af veirunni.

Aðeins er vitað um eitt dæmi um að bandarískur heilbrigðisstarfsmaður hafi verið settur í sóttkví eftir að reglurnar voru settar. Það er hjúkrunarkonan Kaci Hickox en staðfest hefur verið með rannsóknum að hún er ekki smituð af veirunni. Henni hefur engu að síður verið gert að vera 21 dag í sóttkví á heimili sínu.

Hickox hefur virt þessa kröfu stjórnvalda að vettugi og fór hún í hjólatúr í gær, fimmtudag.