Tónlistarveisla á Húrra annað kvöld

Á morgun, laugardaginn 27. september slá þau Intro Beats, DJ Margeir og hljómsveitin Sísý Ey upp heljarinnar veislu á skemmtistaðnum Húrra.

Gleðskapurinn hefst klukkan tíu.

Að sögn hljómsveitarmeðlima Sísý Ey, þeim Friðfinni Sigurðssyni og Sigríði, Elínu og Elísabetu Eyþórsdætrum, verður fókusinn settur á dans.

„Við viljum að allir dansi og skemmti sér. Þetta á að verða tryllt dansipartý!"

Intro Beats hefur vakið mikla athygli undanfarið, þá sérstaklega fyrir lag sitt Release Me sem hann gaf út ásamt DJ Yamaho.

Intro Beats, sem heitir réttu nafni Ársæll Þór Ingvason, er vel þekktur plötusnúður.

Þá var hann annar tveggja umsjónarmanna þáttarins Á bak við borðin sem sýndur var á Popp Tv og Vísi.

Í þáttunum heimsóttu þeir bæði þekkta og óþekkta tónlistarmenn í stúdíóin þeirra, grennsluðust fyrir um vinnuferli þeirra og hvernig þeir búa til músík.

DJ Margeir þekkja flestir en hann er einn þekktasti plötusnúður á Íslandi. Margeir skrifaði á dögunum undir samning við þýska útgáfufyrirtækið HFN-music en fyrirtækið gefur meðal annars út hinn virta tónlistarmann Trentemöller. 

Þá er hann þekktur fyrir að spila í Bláa-lóns partýunum sem haldin hafa verið undanfarið við góðan orðstír. Hann gaf út sína þriðju plötu í sumar.

Hljómsveitin Sísý Ey þekkja flestir fyrir smellinn Ain't got nobody, sem kom út sumarið 2012. Síðan hefur sveitin verið iðin við kolann og fengið tónlistarmenn á borð við Unnstein Manuel í samstarf við sig.

Þannig verður sannkölluð tónlistarveisla á Húrra annað kvöld.