Hvað þýðir fjárlagafrumvarpið fyrir þig?

Fréttablaðið rýndi í hvað ákvæði fjárlagafrumvarpsins, sem fjármálaráðherra lagði fram í gær, þýða fyrir afkomu einstaklinga og fjölskyldna.

Skattalækkanir og hækkun bóta eykur ráðstöfunartekjur, en á móti hækka ýmis gjöld og millifærslum og niðurgreiðslum er hætt, sem þýðir að fólk hefur úr minna fé að spila.

Hækkun barnabóta

Fjárhæðir barnabóta hækka um 13% auk 2,5% verðlagsuppfærslu og er beint frekar að tekjulægri foreldrum með eins prósentustigs hækkun á skerðingarhlutföllum.

Útvarpsgjald lækkað

Gjaldið fer úr 19.400 krónum í 17.800 krónur, og lækkar svo enn frekar í janúar 2016 þegar það verður 16.400 krónur.

Elli- og örorkulífeyrir

Dregið verður úr skerðingum bóta sem þýðir hækkun á útgjöldum til elli- og örorkulífeyrisþega.

Vörugjöld felld niður

Almennt vörugjald verður afnumið þann 1. janúar 2015. Það verður til að lækka verð á sykruðum matvælum, drykkjarvörum, byggingavörum, varahlutum í bíla, stærri heimilistækjum og öðrum raftækjum.

Lækkun virðisaukaskatts

Efra þrep virðisaukaskatts lækkar úr 25,5% í 24%. Undir efra þrepið falla allar vörur og þjónusta sem ekki er í neðra þrepi.

Dæmi um væntanlega verðlækkun:

Bíómiði: 1.100 kr. yrði 1.087 kr.

Ajax triple action 750 ml.:   488 kr. yrði 482 kr.

Klipping kvenna: 6.500 kr. yrði 6.422 kr.

Líkamsræktarkort mánaðargjald:   6.840 kr. yrði 6.758 kr.

Atvinnuleysistímabil stytt

Það tímabil sem heimilt er að greiða atvinnulausum atvinnuleysisbætur verður stytt um hálft ár; úr 36 mánuðum í 30 mánuði.

Sóknargjöld hækkuð

Sóknargjöld til Þjóðkirkjunnar og annarra trúfélaga verða hækkuð í 810 kr. á mánuði en voru áður 750 kr.

Allir vinna

Átakið allir vinna verður ekki framlengt. Um áramót falla því niður endurgreiðslur á virðisaukaskatti vegna vinnu við húsnæði.

Framkvæmdasjóður aldraðra

Lagðar eru til breytingar á lögunum þannig að gjald í Framkvæmdasjóð aldraðra hækki um 2,5% úr 9.911 kr. í 10.159 kr. á ári.

Tóbak og áfengi

Sértæk vörugjöld eru ekki felld niður líkt og þau almennu. Þau eru lögð á vörur með neikvæð ytri áhrif,  það er ökutæki, bensín, dísilolíu, áfengi og tóbak. Þessi gjöld munu hækka um 2,5% í byrjun árs 2015 í samræmi við hækkun verðlags.

Matarskattur hækkar

Lægra þrep virðisaukaskatts verður hækkað úr 7% í 12%. Samkvæmt greiningu sem var unnin fyrir fjármálaráðuneytið þýðir þetta að matarkostnaður fjögurra manna fjölskyldu, þar sem annað barnið er yngra en sjö ára, hækkar um 3.520 krónur. Það þýðir 42.240 króna hækkun á ári í matarkostnað.

Dæmi um væntanlega verðhækkun:

Súrmjólk 1 lítri: 191 kr. yrði 200 kr.

Kellog’s kornflögur: kílóverð 798 kr. yrði 835 kr.

Ali-skinka silkiskorin: kílóverð 2.766 kr. yrði 2.895 kr.

Sætar kartöflur: kílóverð 398 kr. yrði 417 kr.

Gevalia kaffi: 500 gr. 659 kr. yrði 690 kr.

Barna kuldagalli: 9.999 kr. yrði 9.880 kr.