Haukar unnu Hafnarfjarðarmótið

Haukar unnu Hafnarfjarðarmótið í handbolta, en liðið sigraði FH með sex mörkum í úrslitaleik mótsins. Leikið var í Strandgötunni í Hafnarfirði.

Árni Steinn Steinþórsson lék á alls oddi í liði Hauka, en hann skoraði átta mörk. Haukarnir leiddu frá fyrstu mínútu og voru fimm mörkum yfir í hálfleik, 12-7. Lokatölur urðu svo 24-18.

Eins og fyrr segir var Árni Steinn markahæstur hjá Haukum og næstur kom Adam Haukur Baumruk með sex mörk. Ásbjörn Friðriksson var í sérflokki hjá FH og skoraði hann níu mörk.

Í hinum leik dagsins í Hafnarfjarðarmótinu vann Akureyri Íslandsmeistarana í ÍBV eftir ótrúlegan síðari hálfleik. ÍBV var níu mörkum yfir í hálfleik, 18-9, en allt fór í baklás í síðari hálfleik og vann Akureyri leikinn, 27-28.

Sigþór Heimisson skoraði sjö mörk fyrir Akureyraliðið og Heiðar Aðalsteinsson og Jón Sigurðsson skoruðu fimm mörk. Theodór Sigurbjörnsson skoraði sjö mörk fyrir ÍBV og Guðni Ingvarsson sex.