Valdamesti hryðjuverkaleiðtoginn síðan Bin Laden var og hét

Herskáir uppreisnarmenn keyrðu um götur Mosul í gær í bílum merktum íraska hernum.  Einhverjir þeirra heyrðust hrópa „Á leið inn í Baghdad", en eins og við sögðum frá í fréttum okkar í gær óttast íbúar höfuðborgarinnar að innrás ISIS-liða sé yfirvofandi.

Gripið var til ráðstafana í Bagdad í dag og reyna herinn og íbúar borgarinnar að vígbúast eftir fremsta megni.

En hverjir eru þessir uppreisnarmenn og hvert er markmið þeirra?

Samtökin Islamskt ríki í Írak og Sýrlandi (ISIS) viðurkenna ekki núverandi landamæri Sýrlands og Íraks og berjast fyrir stofnun sjálfstæðs ríkis á landsvæðinu. ISIS voru stofnuð sem hliðarsamtök al-Qaeda en þóttu um margt herskárri og öfgafyllri en þessi þekktustu hryðjuverkasamtök heims.

Lítið er vitað um hinn dularfulla leiðtoga ISIS, Abu Bakr al-Baghdadi, sem erlendir fjölmiðlar segja áhrifamesta hryðjuverkaleiðtogann síðan Osama Bin Laden var og hét.

Miðað við uppgang uppreisnarmanna í Írak virðast stjórnvöld og herinn í Írak meta sem svo að við ofurefli sé að etja og hafa látið eftir stjórn fjögurra stórra borga án mikillar mótspyrnu það sem af er árinu.

Fréttastofan AP segir einnig margt benda til þess að fyrrverandi stuðningsmenn Saddams Hussein á meðal súnnímúslíma í her og lögreglu landsins hafi stutt aðgerðir uppreisnarmanna.

Ekki er þó víst að stjórnvölin í Bagdad verði gefin eftir svo auðveldlega og hafa forsetar Írans og Bandaríkjanna heitið yfirvöldum í Írak aðstoð í baráttunni gegn uppreisnaröflunum, þó ekki hafi verið skilgreint nákvæmlega í hverju sú aðstoð verður fólgin.

Tæplega tvö og hálft ár eru síðan Bandaríkjaher yfirgaf landið og lýsti því yfir að hernaði þar væri lokið.