Barcelona á leið í úrslit gegn Real Madrid

Það stefnir allt í draumaúrslitaleik í spænska bikarnum á milli Barcelona og Real Madrid. Fyrri leikir undanúrslitanna fóru fram í kvöld.

Real Madrid vann nágranna sína í Atletico Madrid, 3-0, fyrr í kvöld og nú var Barcelona að leggja Real Sociedad af velli, 2-0.

Sergio Busquets var aldrei þessu vant á skotskónum fyrir Barcelona en hann kom liðinu yfir rétt fyrir leikhlé.

Zubikarai varð svo fyrir því óláni að skora sjálfsmark hálftíma fyrir leikslok.

Síðari leikirnir fara fram eftir viku.