Makedóníumenn með flautuna í Pólverjaleiknum á morgun

Makedóníumennirnir Gjorgi Nachevski og Slave Nikolov munu dæma leik Íslands og Póllands um fimmta sætið á Evrópumótinu í handbolta í Danmörku en leikurinn fer fram klukkan þrjú á morgun.

Gjorgi Nachevski og Slave Nikolov hafa ekki dæmt hjá íslenska handboltalandsliðinu á mótinu en þeir dæmdu aftur á móti endurkomuleik Pólverja á móti Rússum í lokaumferð riðlakeppninnar.

Þetta var án vafa einn allra eftirminnilegasti sigur Pólverja á mótinu enda hefði tap þýtt að liðið kæmist ekki áfram í milliriðilinn.

Pólverjar voru fjórum mörkum undir í hálfleik í þeim leik en skoruðu 11 af fyrstu 13 mörkum seinni hálfleiksins og unnu að lokum tveggja marka sigur, 24-22.

Slóveníumennirnir Nenad Krstic og Peter Ljubic dæma undanúrslitaleik Frakka og Spánverja á morgun en Þjóðverjarnir Lars Geipel og Marcus Helbig dæma undanúrslitaleik Dana og Króata.