Umfjöllun: Ísland - Austurríki 30-22 | Sannfærandi sigur hjá strákunum

Íslenska karlalandsliðið í handbolta vann átta marka sigur á Austurríki, 30-22, í öðrum leik sínum á fjögurra þjóða æfingamótinu í Þýskalandi.

Íslenska liðið átti ekki í miklum vandræðum með lærisveina Patreks Jóhannessonar í austurríska landsliðinu sem höfðu unnið Þýskaland í fyrsta leik sínum á mótinu.

Aron Kristjánsson, þjálfari íslenska liðsins, leyfði sér að hvíla Aron Pálmarsson sem tryggði íslenska liðinu sigur á Rússum í gærkvöldi.

Það voru áfram margir að skila mörkum í sóknarleiknum og varnarleikurinn var mun betri en í leiknum á móti Rússum í gær sem eru góðar fréttir fyrir íslenska liðið sem er að undirbúa sig fyrir Evrópumótið í Danmörku.

Þórir Ólafsson var markahæstur í íslenska liðinu með fimm mörk en þeir Ólafur Bjarki Ragnarsson og Ólafur Guðmundsson skoruðu allir fjögur mörk. Alls skoruðu sex leikmenn íslenska liðsins þrjú mörk eða fleiri í leiknum.

Tólf íslenskir leikmenn skoruðu í leiknum og vann liðið á breiddinni en austurríska liðið þreyttist er líða tók á leikinn og náðu varamenn liðsins ekki að setja mark sitt á leikinn líkt og þeir íslensku gerðu.

Aron Rafn Eðvarðsson stóð allan leikinn í markinu fyrir utan eina sókn þegar Snorri Steinn Guðjónsson þurfti að standa í markinu. Honum gafst ekki tími til að skipta útaf eftir að hafa verið í sókninni í markmannastreyju þegar Ísland var manni færra.

Björgvin Páll Gústavsson kom einu sinni inn til að freista þess að verja víti en Aron Rafn átti góðan leik í markinu fyrir aftan góða vörnina sem náði mun betur saman en í leiknum í gær.

Íslenska liðið var með frumkvæðið í fyrri hálfleik en missti forskotið niður í jafna stöðu, 11-11 fyrir hálfleik. Austurríkismenn skoruðu fyrsta markið í seinni hálfleiknum en þá fóru íslensku strákarnir, skoruðu þrjú mörk í röð og voru með frumkvæðið það sem eftir lifði leiks.

Íslenska liðið er því búið að vinna tvo fyrstu leiki sína á mótinu og verður búið að vinna mótið takist Rússum að vinna Þjóðverja seinna í kvöld. Þetta eru góðar fréttir fyrir Evrópumótið í Danmörku.