Benjamin snýr aftur

Skallagrímur í Borgarnesi hefur náð samkomulagi við Benjamin Curtis Smith um að leika með liðinu það sem eftir lifir keppnistímabilsins í Dominos-deild karla í körfubolta.

Benjamin er ekki ókunnur íslenska boltanum því hann lék við góðan orðstír með Þór í Þorlákshöfn síðastliðið keppnistímabil og skilaði mjög góðum tölum og framlagi til liðsins.  

Eftir misjafnt gengi á erlenda leikmannamarkaðnum binda Skallagrímsmenn miklar vonir við að Benjamin Curtis Smith nái að koma sterkur til leiks og hjálpa Skallagrímsliðinu við að rétta hlut sinn í deildinni. Á heimasíðu Skallagríms kemur frma að margt búi í liðinu sem hins vegar hafi ekki tekist að sýna.

Curtis Smith er þriðji Kaninn sem reynir fyrir sér í Borgarnesi á leiktíðinni. Oscar Bellfield hefur yfirgefið Skallagrímsliðið eftir stutta veru á Íslandi.