Iniesta til í að skrifa undir nýjan samning

Hinn magnaði miðjumaður Barcelona, Andres Iniesta, hefur spilað með Barcelona allan sinn feril og hann vill ljúka ferlinum hjá félaginu.

Hinn 29 ára gamli Iniesta er með samning til ársins 2015 og hann er til í að skrifa undir nýjan samning sem gildir þar til hann ákveður að hætta.

"Það er minn draumur að enda ferilinn hjá Barcelona. Það hefur ekkert breyst í þeim málum. Ég á ekki von á neinum vandræðum í samningaviðræðunum," sagði Iniesta.

Iniesta hefur leikið yfir 300 leiki fyrir félagið. Hann kom upp í gegnum akademíu Barcelona, La Masia, og hefur verið einn besti miðjumaður heims undanfarin ár.