Lewandowski bíður eftir draumafélaginu

Robert Lewandowski bíður eftir því að losna frá Dortmund og ganga til liðs við „draumafélagið“ sitt. Líklegast að hann eigi við Bayern München, þó svo að hann nefni ekki félagið á nafn.

Lewandowski er 24 ára gamall og hefur verið sterklega orðaður við Bayern, sem vann þrefalt þetta árið. Bayern hafði einmitt betur gegn Dortmund í úrslitaleik Meistaradeildar Evrópu.

„Ég á von á því að það verði gengið frá málunum á næstunni svo ég geti farið til draumafélagsins míns í sumar,“ sagði hann við þýska fjölmiðla. „Það væri best fyrir alla hlutaðeigandi.“

Mario Götze fer frá Dortmund til Bayern í sumar en tilkynnt var um félagaskiptin stuttu fyrir úrslitaleik Meistaradeildarinnar. Götze missti svo af leiknum vegna meiðsla.

„Dortmund er frábært félag sem ég mun ávallt dást að. En nú vil ég fá nýja áskorun,“ sagði Lewandowski.