Hafa þegar tryggt sér 1,45 prósenta hlut

Starfsmenn Landsbankans hafa þegar tryggt sér 1,45 prósenta hlut í bankanum. Virði þess hlutar er sem stendur um þrír milljarðar króna. Alls geta þeir eignast tveggja prósenta hlut ef valdar eignir sem hann innheimtir hækka enn meira í virði út þetta ár. Virði þeirra jókst um sex milljarða króna á fyrstu þremur mánuðum ársins í ár, samkvæmt árshlutauppgjöri bankans sem birt var í lok síðustu viku.

Þegar uppgjör fór fram milli gamla og nýja Landsbankans í desember 2009 hélt þrotabú þess gamla eftir 18,7 prósenta hlut í nýja bankanum. Afgangurinn, 81,3 prósent, fór til íslenska ríkisins sem vistar hann í Bankasýslu ríkisins. Á móti gaf nýi bankinn út skilyrt skuldabréf sem á að gera upp miðað við stöðu þess í árslok 2012. Það getur mest orðið 92 milljarða króna virði. Ef það gerist mun þrotabúið fá þá greiðslu og skila eignarhlutnum sem það fékk fyrir tveimur og hálfu ári. 16,7 prósent hans færu til Bankasýslunnar en tveggja prósenta hlutur í að mynda stofn að nýju kaupaukakerfi fyrir starfsmenn nýja bankans.

Miðað við þessa stöðu skuldabréfsins í dag er þegar tryggt að 1,45 prósenta hlutur fer í að mynda stofn að nýju kaupaukakerfi Landsbankans. Eigið fé bankans var 208 milljarðar króna í lok mars síðastliðins og því er innra virði hlutar starfsmannanna þegar orðið um þrír milljarðar króna. Hugmynd fjármálaráðuneytisins var upphaflega að kaupaukakerfið næði til allra starfsmanna bankans. Alls voru stöðugildi í Landsbankanum 1.308 talsins í lok mars síðastliðins. Miðað við það dygði sú upphæð sem þegar myndar stofn kaupaaukakerfisins, rúmlega þrír milljarðar króna, til að hver og einn þeirra fengi 2,3 milljónir króna.

Fjármálaeftirlitið (FME) takmarkaði það þó með reglum sem það setti um kaupaukakerfi um mitt ár 2011. Samkvæmt þeim mega stjórnarmenn og starfsmenn sem starfa við innri endurskoðun og regluvörslu ekki fá kaupauka.

Ef virðisaukning skuldabréfsins verður alger mun virði hlutar starfsmannanna verða tæplega 4,2 milljarðar króna miðað við eiginfjárstöðu bankans í dag.

thordur@frettabladid.is